Бар асари чанд таркиш дар назди бинои Вазорати корҳои хориҷии Афғонистон дасти кам 8 нафар кушта ва беш аз 10 каси дигар захмӣ шудааст.
Бино ба иттилои расонаҳои Афғонистон, ин таркиш баъд аз зуҳри рӯзи чоршанбеи 11-уми январ дар назди бинои Вазорати корҳои хориҷии Афғонистон рух додааст.
Ба қавли ин расонаҳо, таркиш дар замоне рух додааст, ки бархе мақомоти дипломатии Чин дар дохили бинои Вазорати корҳои хориҷӣ ҳамроҳ бо ҳамтоёни худ аз Иморати исломии Толибон мулоқот ва гуфтугӯ доштанд.
Афғонистон Интернешнл теъдоди кушташудаҳоро 8 нафар ва захмиҳоро ҳам ба ҳамин миқдор арзёбӣ кардааст, аммо
Аз сӯи дигар Холид Задрон, сухангӯи полиси Кобул дар саҳфаи худ дар Твиттер гуфтааст, ки ин ҳодиса соати 4 баъд аз зуҳр сурат гирифт. Вай вуҷуди талафоти ҷониро дар ин ҳодиса таъйид кардааст, вале дар бораи теъдоди дақиқи қурбониён ва осебдидагон ин ҳодиса чизе нагуфтааст.
Дар бархе аксу наворҳои нашршуда дар шабакаҳои иҷтимоӣ низ дида мешавад, ки ҷасадҳои беҷони чандин нафар, ки дар тан либоси мулкӣ ва низомӣ доранд, бо осори захму хунрезӣ рӯи роҳ ва роҳравҳо хобидааст.
Гуфта мешавад, то замони таҳияи ин матлаб касе ва ё ниҳоде масъулияти ин ҳамла ва таркишҳоро ба уҳда нагирифт, вале хабаргузории Фаронса ба нақл аз шоҳидони айнии худ гуфтааст, ки маргталабе худро дар байни издиҳоми мардум, ки бархе аз кор рухсат мешуданд, таркондааст.
