Аз ин ба баъд муҳоҷирони меҳнатӣ дар вилояти Маскав тибқи қоида ва усулҳои нав ба кор ҷалб карда мешаванд. Ҳукумати Русия қоидаҳои нави фаъолияти меҳнатии шаҳрвандони хориҷиро тасдиқ кард. Дар ин бора Сарраёсати амнияти минтақавии вилояти Маскав хабар дод.
“Ташкилотҳое, ки ба ҷалби қувваи кории хориҷӣ манфиатдоранд, бояд интиқоли муҳоҷирон, додани иҷозатномаҳо барои шуғли онҳо, бастани шартномаҳои меҳнатӣ, муҳайё сохтани ҷойи зист ва хӯрок, назорат намудани онҳо пас аз вурудашон дар Русия, инчунин риояи қоидаҳои санитарию эпидемиологиро аз ҷониби онҳо таъмин кунанд” , – қайд кард муовини сарвазири вилояти Москва – роҳбари Сарраёсати амнияти минтақавии вилоятӣ Роман Каратаев.
Ин қоидаҳои навро Вазорати меҳнат ва ҳифзи иҷтимоии Федератсияи Русия таҳия кардааст. Дар доираи он ташкилотҳои минтақаи Маскав, ки бо муҳоҷирони меҳнатӣ сару кор доранд, метавонанд мустақилона барои ҷалби коргарони хориҷӣ ба системаи иттилоотию таҳлилии “Пойгоҳи иттилоотии умумирусиягии ҷойҳои кории холии” Кор дар Русия ” муроҷиат кунанд.
Вазифаи назорат ва амалисозии ин қоидаҳои навро мақомоти Сарраёсати амнияти минтақавии вилояти Маскав ва Вазорати рушди иҷтимоии Русия ба душ гирифтаанд.
Бино ба тасдиқи мақомоти Русия бинобар чораҳои маҳдудкунӣ дар соли 2020, дар ин кишвар норасоии қувваҳои кории хориҷӣ дар соҳаҳои гуногуни иқтисодиёт ба вуҷуд омадааст. Гуфта мешавад, ин кишвар танҳо барои кор дар соҳаи сохтмон ва соҳаи манзилию коммуналӣ дар минтақа тақрибан 10 ҳазор муҳоҷири меҳнатӣ ниёз дорад.
