Дар Тоҷикистон теъдод кӯдаконе, ки имсол ба синфи як мераванд, нисбат ба ҳамин давраи соли гузашта 13 дарсад зиёд шудааст.
Имрӯз, 1-уми сентябри соли 2022 Президенти Тоҷикистон Эмомалӣ Раҳмон дар “мулоқот бо аҳли маорифи пойтахт дар Рӯзи дониш ва дарси сулҳ”-аш гуфт, ки имсол 272 ҳазор хонанда “бори нахуст ба остонаи мактаб қадам гузоштанд.”
Эмомалӣ Раҳмон, ки дар бораи сулҳу дониш гап мезад, афзуд: “Имрӯз, яъне 1 сентябр қариб 2 миллиону 300 ҳазор нафар навраси кишвар, аз ҷумла беш аз 1 миллиону 110 ҳазор духтар дар муассисаҳои таълимӣ ба дарс оғоз карданд, ки 272 ҳазори онҳо бори нахуст ба остонаи мактаб қадам гузоштанд.”
Гуфта мешавад, ки тибқи оморҳои расмӣ дар соли 2021 теъдоди кӯдаконе, ки бори нахуст ба остонаи мактаб қадам гузошта, ба синфи 1 қабул шуда буданд, 240 ҳазор нафарро ташкил медод.
