Эмомалӣ Раҳмон, ки ин шабу рӯзҳо дар сафари корӣ дар шаҳру ноҳияҳои вилояти Хатлон қарор дорад, дар рикоби худ беш аз 80 нафарро ҳамроҳ дорад.
Хадамоти матбуоти Презединети Тоҷикистон, ки ҷараёни ин сафарҳоро пайгирӣ ва бахше аз рӯйдоҳои муҳимми онро иттилоърасонӣ мекунад, мегӯяд, корвони Эмомалӣ Раҳмонро дар ин сафарҳояш дасти кам 18 мошинҳои гаронқимат, ки аксари онҳо дорои 7 ҷои нишаст мебошанд, ҳамроҳӣ мекунанд.
Ҳамзамон як манбаъ аз Вазорати корҳои дохилӣ дар суҳбат ба Azda.tv гуфт, ки дар аксари ин “ҷипҳо” беш аз 4 нафарӣ нишаста, дар идомаи сафарҳо Эмомалӣ Раҳмонро ҳамроҳӣ мекунанд. Дар байни онҳо теъдоде аз муҳофизони шахсии Президенти Тоҷикистон ҳам ҳузур доранд.
Ба гуфтаи ӯ, бар иловаи ҳузури ин ҳама муҳофизону раҳбароне, ки мошини президентро дар роҳҳо аз пешу пушт ҳамроҳӣ мекунанд, беш аз 600 нафари дигар ҳам аз кормандони Вазорати корҳои дохилӣ, Кумитаи давлатии амнияти миллӣ, Прокуратураи генералӣ ва дигар ниҳодҳо дар ду тарафи роҳҳо ва шаҳраку деҳаҳо дар ҳамагуна шароит соатҳо рост истода, амниятро таъмин мекунанд.
Гуфта мешавад, дар чунин сафарҳо аксар вақт ҳамагуна хароҷоти хӯрду хурок, таъмин кардан ба ҷои хоб ва ғайра ба дӯши ҳокимиятҳои маҳаллӣ бор карда мешавад ва ин ҳокимиятҳои маҳаллӣ низ бори гарони ин масъулиятҳоро ба шонаи мардум мепартоянд ва онҳоро маҷбур мекунанд, ки аз ҳайати Эмомалӣ пазироӣ кунанд.
