Додгоҳи олии Тоҷикистон таҷовузгар ва қотили Руфайдаи ноболиғро ба ҳабси абад маҳкум кард. Дар ин бора Радиои Озодӣ аз қавли наздикони Руфайда хабар дод.
Ҳукми Додгоҳи олии кишвар нисбати Раҳматулло Гадоев – шахсе, ки ба қатли Руфайда муттаҳам мешавад, субҳи рӯзи сешанбе, 19-уми октябр эълон шудааст, аммо дар сомонаи Додгоҳ то ҳол расман нашр нашудааст.
Дар мавриди ин ҳукм то ҳол назари наздикон ва вакили мудофеи Гадоев дастрас нест.
Аммо Валиҷон Иноятов, падари Руфайда Иноятова ба Радиои Озодӣ гуфта, ки аз ҳукми Додгоҳ розиянд, вале ҷузъиёти бештаре надодааст. “Танҳо ҳаминро мегӯям, ки аз ҳукми додгоҳ розием. Талаби мо аз аввал ҳамин буд, ки ин шахс ба ҳабси абад маҳкум шавад”, афзудааст Иноятов.
Ёдовар мешавем, ки моҳи июни имсол дар шаҳраки Навободи ноҳияи Рӯдакӣ ҷасади Руфайдаи хурдсол аз ҳоҷатхонаи ҳамсояашон пайдо шуд. Ӯ як рӯз пеш аз назди хонаашон нопадид шуда буд.
Хабари қатли ӯ ҷомеаи тоҷикро такон дод. Фаъолони ҷомеаи шаҳрвандӣ бо ирсоли нома ба шаҳрдори Душанбе ва ҳамзамон раиси Маҷлиси миллӣ талаб карда буданд, ки тафтишоти қатли ин тифлаки хурдсолро шахсан зери назорат бигирад ва ҷазо барои чунин кирдорҳои бад сангинтар шавад.
