Имрӯз 7-уми январи соли ҷорӣ мурофиаи парвандаи пурсарусадои куштори Алиризо Худоёрови 21-сола ба поён расид. Дар ин бора Ҷунайдулло Худоёров, амаки Алиризо дар саҳфаи фейсбукиаш хабар дод.
Гуфта мешавад, ин мурофиа дар бинои Додгоҳи Олии Ҷумҳурии Тоҷикистон дар шаҳри Душанбе баргузор шуда, додраси парванда Ғуломзода Сафарбек, ду сокини деҳаи Яшмро дар қатли ҳамдеҳаашон Алиризо Худоёров гунаҳкор шинохта, Зафарҷони Насриддинро ба 19 сол ва Абдулло Азимовро ба 17 соли зиндони низомаш сахт маҳкум кард.
Дар мурофиаи гузашта, айбдоркунандаи давлатӣ барои Зафарҷони Насриддин 20 сол ва барои Азимов Абдулло 19 соли зиндонро талаб намуда буд.
“Ҳарчанд ин ҳукм барои ҷинояти анҷомдодаи номбурдаҳо сабук аст, вале дигар қонун аст ва ман шахсан розӣ ҳастам аз ҳукми додгоҳ. Вале мо Худоёровҳо норозигии худро дар он баён медорем, ки дар қатли бародарзодаи мо Алиризо Худоёров дасти кам 6- нафар бо шумули фармоишгар шарик ҳастанд ва феълан ду нафар ба додгоҳ кашида шуданду халос. Мо барои ҳама заҳмат ва талошҳо ба мақомотҳои дахлдори давлатӣ изҳори миннатдории худро баён менамоем ва дар идома хоҳишу талаб дорем, ки боқимонда шарикони ҷиноятро ба ҷавобгарӣ ҷалб намоянд!”, менависад Ҷунайдулло Худоёров.
Ёдовар мешавем, 12-уми июли соли 2021 дар деҳаи Яшми ноҳияи Рашт 6 нафар (аз хонаводаи Ҳусейновҳо ва Ҳамидовҳо) Алиризо Худоёров, донишҷӯи соли дуюми риштаи ҳуқуқи Донишкадаи Раштро ҳадафи ҳамла ва латтукӯб қарор дода, ба қафаси синааш корд задаанд. Ӯро дар ҳолати вазнин ба бемористон бурданд, вале табибон натавонистанд ин ҷавонро аз марг наҷот диҳанд. Корд ба қалби ӯ расида буд.
Кормандони ВКД дар аввал 4 нафарро дастгир карда буданд, вале парвандаи танҳо Зафарҷони Насриддин, ки гуфта мешавад, зарбаи кордро ба қалби Алиризо Худоёров маҳз ӯ задааст ва Азимов Абдулло то ба додгоҳ расид, аммо ба гуфтаи Худоёровҳо боқӣ иштирокдорони ҷиноят бо ҳар роҳҳое аз ҷавобгарии ҷиноятӣ озод карда шуданд.
