Русия ҳамчун кумаки башардӯстона дар чорчӯби Барномаи ҷаҳонии озуқаи СММ барои таъмини ғизои донишомӯзони мактабҳои Тоҷикистон ду миллион доллар ҷудо кардааст.
Гуфта мешавад, ин кумакҳо танҳо барои дастгирии барномаи ғизои мактабӣ дар Тоҷикистон истифода хоҳанд шуд. Дар ин бора Адҳам Мусаллам, мудири Созмони ҷаҳонии ғизо дар Тоҷикистон дар мусоҳиба бо “РИА Новости” хабар дод.
Ба гуфтаи ин намояндаи СҶҒ ин маблағ барои харидани 3650 тонна маводи ғизоӣ сарф мешавад. Ин миқдор маводи ғизоӣ ҳудуди ду ҳазор мактаби Тоҷикистонро таъмин хоҳад кард, ки дар онҳо 450 ҳазор хонанда таҳсил мекунанд.
Аз соли 2013 Русия барои иҷрои барномаи ғизои мактабӣ дар Тоҷикистон дар чорчӯби Барномаи ҷаҳонии озуқаи СММ 82,1 миллион доллар кумак кардааст.
