Иттиҳоди Аврупо дар доираи барномаи рушди таҳсилоти касбӣ-техникӣ ба Тоҷикистон 30 миллион евро кумак мекунад.
Бино ба иттилои расмӣ, 25-уми октябри соли 2023 Сироҷиддин Муҳриддин ҳамроҳ бо Ютта Урпилайнен эъломияи кумаки 30 миллион евроиро ба буҷети Тоҷикистон дар ҳошияи форуми “Дарвозаи ҷаҳонӣ”-и Аврупо имзо карданд.
Ба қавли манбаъ, ин эъломияро Сироҷидин Муҳриддин, вазири корҳои хориҷии Тоҷикистон ва Ютта Урпилайнен, комиссари Иттиҳоди Аврупо оид ба ҳамкориҳои байналмилалӣ барои ҷудо кардани маблағ дар ҳаҷми 30 миллион евро “ҷиҳати рушди таҳсилоти касбӣ-техникӣ” дар Тоҷикистон имзо карданд.
Вазорати корҳои хориҷии Тоҷикистон мегӯяд, “маблағи мазкур барои татбиқи барномаҳо баҳри таъмини ҷавонон ва бонувон бо шуғл дар бахшҳои муҳими иқтисодӣ, аз қабили кишоварзӣ, энергетика ва саноати сабзу рақамӣ равона хоҳад шуд.”
Гуфта мешавад, Иттиҳоди Аврупо ин 30 миллион евроро барои “дастгирии молиявии буҷет” анҷом медиҳад, то ҳукумат тавонад “унсурҳои нави муосир дар таҳсилоту таълими техникӣ ва касбиро” дар низоми таълим ва “гузариши сабз” анҷом диҳад.
Ба гуфтаи бархе коршиносон, гузоришҳои расмӣ ва расонаӣ нишон медиҳанд, ки дар давоми беш аз 30 сол аз ҳукмронии Эмомалӣ Раҳмон даҳҳо миллион доллар аз кумакҳои фиристодаи кишварҳо ва созмонҳои ҷаҳонӣ бо баҳонаҳои мухталиф аз буҷети Тоҷикистон ғорат карда шудаанд, ба ин хотир, ҳанӯз маълум нест, ки ин 30 миллион евро пурра дар ҷои худ истифода мешавад ё на?
