Бонки ҷаҳонӣ бо мақсади дастгирӣ ва беҳбуд бахшидан ба вазъи молии ширкати давлатии энержии “Барқи Тоҷик” 80 миллион доллари амрикоӣ кумак мекунад.
Вазири молияи Тоҷикистон Файзиддин Қаҳҳорзода бо раиси дафтари Бонки ҷаҳонӣ дар Тоҷикистон Озан Суйим Созишномаи маблағгузории ин бонк ба ширкати “Барқи тоҷик”-ро дар Душанбе имзо карданд.
Арзиши умумии лоиҳаи навбатии сармоягузории Бонки ҷаҳонӣ ба “Барқи Тоҷик” 80 миллион доллари амрикоиро дар бар мегирад.
Гуфта мешавад, мақсад асосии ин кумакҳо беҳтар намудани вазъи молиявӣ, қобилияти пардохтпазирии он, беҳтар намудани идоракунӣ ва шаффофияти кории ҶСК “Барқи тоҷик” мебошад.
“Барқи Тоҷик” ягона ширкати давлатии энержии кишвар буда, ҳамасола қарзҳояш аз ширкатҳои тавлидкунандаи барқ меафзояд. Гуфта мешавад, қарзи ин ширкат танҳо дар назди нерӯгоҳи обии барқии “Сангтӯда-1” беш аз 200 миллон доллари амрико буда ва он дар ҳоли афзоиш аст.
