Иёлоти Муттаҳидаи Амрико қасд дорад дар ду соли оянда барои мустаҳкам кардани вазъи амнияти Тоҷикистон зиёда аз 60 миллион доллар кумак кунад.
Сафорати Амрико дар Тоҷикистон хабар додааст, ки, 5-уми майи соли 2022 маросими супоридани 8 мошини “IVECO” ва қисмҳои эҳтиётӣ ба маблағи 2,3 миллион доллар бо хонум Бриҷет Уолкер, муовини Сардори Намояндагии ИМА ва генерал-майор Хайриддин Ҳукмиддинзода, намояндаи вазорати мудофиаи Тоҷикистон дар шаҳри Душанбе баргузор шуд.
Хонум Бриҷет Уолкер, муовини Сардори Намояндагии ИМА гуфтааст:
“Ҳамчун далели ҳамкории қавӣ, мо ба Тоҷикистон ба маблағи беш аз 60 миллион доллар, ҳамчун кумак ба соҳаи амният ҷудо кардем, ки он дар давоми ду соли оянда амалӣ ва расонида хоҳад шуд.“
Муовини Сардори Намояндагии ИМА дар Душанбе таъкид кардааст:
“Ин хайрия танҳо як мисоли кумакҳое аст, ки мо ба артиши тоҷик мерасонем ва тааҳҳуди моро барои беҳбуд бахшидан ба тавонмандии Тоҷикистон барои дифои худ аз ҷангҷӯёни мусаллаҳ ва ҷилавгирӣ аз гардиши маводи мухаддири ғайриқонунӣ нишон медиҳад.”
Тоҷикистон дар муддати 30 соли истиқлол натавонист артиши худро бидуни кумакҳои хайрияҳои кишварҳои хориҷӣ бисозад. Артише, ки бо раҳбарии Эмомалӣ Раҳмон дар ин замон сохта шуд, аксари сарбозонаш бо роҳи сарбозшикор ё худ “облава” ба сафи қувваҳои мусаллаҳ ҷалб карда мешаванд ва таҷҳизоти низомиаш қисман бо роҳи кумакҳои хайрияи кишварҳое назири ИМА, Чин, Қазоқистон ва боқимонда бо кӯҳнатаҷҳизоти артиши Русия ва дигар кишварҳо муҷаҳҳаз шудааст.
