Бонки Осиёии Рушд ба Тоҷикистон 105 миллион доллари дигар қарзи бебозгашт медиҳад. Дар ин бора имрӯз 3-юми март Файзиддин Қаҳҳорзода, вазири молияи Тоҷикистон дар парлумон гуфт.
Гуфта мешавад, ин маблағ барои “рушди соҳаи энержӣ” ва “коҳиши талафоти нерӯи барқ” равона мешавад.
Ҳамчунин вазир қайд кард, ки аз ин ҳисоб хариду насби 398 ҳазор ҳисобкунакҳои муосир пешбинӣ шудааст. Аз ин гранти ҷудо намудаи Бонки Осиёии Рушд 70 миллион доллари он барои коҳиши талафоти барқ ва рушди низоми биллингӣ ва боқимонда ба бахшҳои дигари арсаи энержӣ харҷ мешавад.
Ин грант ба Ҳукумати ҶТ дар ҳоле ҷудо шуда истодааст, ки шаҳрвандони ин кишвар ба мушкилии норасоии барқ рӯбарӯ ҳастанд ва дар бештари манотиқи кишвар расман лимит ҷорӣ шудаст.
Шурӯъ аз моҳи июли соли 2018 чархаи аввалини нерӯгоҳи “Роғун” сохта ва ба истифода дода шуд. Он замон худи Эмомалӣ Раҳмон гуфта буд, ки дигар лимити барқ ба охир расидааст ва мардум бебарқиро ба хотираҳо хоҳанд супурд.
Аммо сокинони кишвар мегӯянд, имсол бебарқӣ аз солҳои пешин ҳам бадтар шудааст. Дар баъзе манотиқи кишвар дар як шабонарӯз чор то панҷ соат барқ доранду тамом.
