Шаби 20-уми ноябр маросими кушодашавии Ҷоми ҷаҳон-2022 дар варзишгоҳи “Ал-Байт”-и Қатар баргузор гардид.
Гуфта мешавад ин аввалин Ҷоми ҷаҳонии футбол дар таърихи як кишвари арабӣ ва исломӣ аст ва дар он бо вуҷуди ихтилофоти байни якдигар аксари раҳбарони кишварҳои исломӣ ҳузур пайдо карданд.
Дар кушодашавии Ҷоми ҷаҳон-2022 дар баробари амири Қатар, шайх Тамим ибн Ҳамд ибни Халифа ва падараш Ҳамд ибн Халифа ва раиси FIFA Ҷанни Инфантино, инчунин Муҳаммад ибн Салмон, валиаҳди Арабистони Саудӣ, Абдуллоҳ II ибн Ҳусейн подшоҳи Урдун, Абдулфаттоҳ Сисӣ, раисҷумҳури Миср, Абдулмаҷид Таббун, раисҷумҳури Алҷазоир, президенти Туркия, Раҷаб Таййиб Эрдуғон ва раиси Ташкилоти худгардони Фаластин Маҳмуд Аббос ширкат доштанд.
Дар маросими кушодашавӣ қорӣ ва варзишгари маъюб Ғоним Мифтоҳ дар ҳузури ҳунарманди шинохтаи Ҳоливуд Морган Фриман аз Қуръон оятеро тиловат кард.
Яке аз ангезаҳои асосии ин маросим, нишон додани ягонагии тамоми мардум, сарфи назар аз тафовути ранги пӯст, фарҳанг ва ғайра буд.
Инчунин дар ин маросим намоишу рақсҳову мусиқиҳои зиёде нишон дода шуда, Чон Ҷон Гук, сарояндаи гурӯҳи BTS мусиқии зиндаро иҷро карда, дар идомаи Фаҳд Алкабисӣ хонандаи қатарӣ ҳам ба ӯ пайваст ва таронаеро бо ҳам хонданд.
Дар охир амири Қатар суханронии кӯтоҳе карда, ҳозиринро хушомад гуфт.
Тамошобинон ва иштирокдорони ин маросим мегӯянд, ки дар таърихи Ҷоми ҷаҳонии футбол ин зеботарин маросими кушодашавӣ буд.
Дар аввалин бозии Ҷоми ҷаҳон 2022, ки баъд аз маросими кушодашавӣ шуруъ шуд, дар он дастаи мунтахаби Қатар, ки мизбони ин бозиҳост аз тими Эквадор бо ҳисоби 0:2 шикаст хӯрд.
Гуфта мешавад, бори аввал аст, ки Ҷоми ҷаҳонии футбол моҳҳои ноябр – декабр доир мегардад.
Дар марҳилаи гурӯҳӣ 32 дастаи мунтахаб, ки ба 8 гурӯҳи чордастаӣ тақсим шудааст, барои роҳ ёфтан ба даври плей-офф мубориза мебаранд. Дастаҳое, ки дар гурӯҳҳо ҷойҳои якуму дуюмро мегиранд, ба даври ҳаштякниҳоӣ роҳ меёбанд.
Финали қаҳрамонӣ рӯзи 18-уми декабр дар Варзишгоҳи миллии Лусаил, ки дорои 80 ҳазор ҷойи нишаст барои тамошобинон аст, баргузор хоҳад шуд.
