Литсейи Оқохон дар Вилояти Мухтори Кӯҳистони Бадахшон низ давлатӣ шуд.
Имрӯз, 4-уми июл кормандони собиқи Литсейи Оқохон ба Радиои Озодӣ гуфтаанд, ки идораи маорифи вилоят рӯзи 30-юми июн дари литсейро муҳр зада, хабар додаанд, ки ҳамаи омӯзгорон аз вазифаҳояшон барканор шудаанд.
Гуфта мешавад, дар ҷойи ин литсей мактаби хонандагони боистеъдод таъсис ёфта, зери назари Вазорати маорифи кишвар амал хоҳад кард.
Пас аз ин қарори мақомот беш аз 120 омӯзгор ва чандин корманди ду боғчаи кӯдаконаи зери идораи Литсейи Оқохон бекор мондаанд.
То ҳол назари мақомот дар бораи баста шудани ин литсей дастраси расонаҳо нашудааст.
Литсейи Оқохон соли 1998 бо ҳузури Шоҳзода Карим Оқохон ва раисҷумҳури Тоҷикистон Эмомали Раҳмон боз шуда буд. Дар он дар як вақт 1200 нафар хонанда таҳсил намуда, дар он ба ҷуз забони тоҷикӣ, бо забонҳои англисӣ ва русӣ ба хонандагон тадрис сешуд.
Гуфта мешавад, бештари хатмкунандагони ин литсей ба донишгоҳҳои байналхалқӣ дохил мешуданд ва дар озмунҳои ҷумҳуриявӣ ҳам натиҷаҳои хубро ба даст меоварданд.
Литсейи Оқохон ягона муассисае нест, ки фаъолияташ қатъ ва ба моликияти давлат зам мешавад. Пештар аз ин меҳмонхонаи “Серена”-и Шабакаи Оқохон (AKFED), дар маҳаллаи Теми шаҳри Хоруғ давлатӣ шуда буд.
Инчунин гуфта мешавад, ки мақомоти вилоят мехоҳанд Маркази тиббии вобаста ба Шабакаи Оқохон дар Хоруғро низ давлатӣ кунанд.
Мақомот соли гузашта Боғи марказии фароғатии шаҳри Хоруғро, ки зери сарпарастии Бунёди Оқохон буд, низ ба моликияти давлатӣ табдил доданд.
