Бо қарори Раёсати ҳолатҳои фавқулоддаи Литва тамоми муҳоҷирони ғайриқонунӣ бозпас фиристода мешаванд. Дар ин бора Вазорати корҳои дохилаи Литва хабар медиҳад.
Агне Билотайте сардори Раёсати ҳолатҳои фавқулодда дар сатҳи давлатии Литва ба ҳама муассисаҳое, ки ҳифзи сарҳади ин кишварро таъмин мекунанд, дастур дода, ки бояд барои муҳофизати сарҳади давлатии Ҷумҳурии Литва тамоми чораҳои заруриро андешанд ва барои вуруди ғайриқонунӣ ба қаламрави Ҷумҳурии Литва шароит фароҳам наоранд.
Билотайте мегӯяд, сарҳади Литва бояд бо ҳама воситаҳои қонунӣ аз ҳама гуна убури ғайриқонунии сарҳади давлатӣ муҳофизат карда шавад. Инчунин афзуд, Хадамоти марзбононии давлатӣ вазифадор ҳаст, ки дар чунин ҳолатҳо аз чораҳои тактикӣ истифода барад.
“Шахсоне, ки қасдан ва дидаву дониста ғайриқонунӣ сарҳади давлатиро дар ҷойҳои мамнӯъ қасди убур мекунанд, бояд ҷинояткор дониста шаванд”, – мегӯяд Агне Билотайте.
“Дар Литва раванди пешниҳоди дархости паноҳандагӣ мавҷуд ҳаст, ки онро метавон тавассути убури қонунии сарҳад ва риояи талаботи байналмилалӣ ба даст овард”, таъкид шудааст дар қарор.
Қаблан вазири корҳои хориҷии Литва, Габриелиус Ландсбергис низ аз муҳоҷирон даъват карда буд, ки дар омадан ба Аврупо роҳҳои қонуниро биҷӯянд, дар ғайри он муҷирим шинохта шуда, бозпас фиристода мешаванд.
Инчунин вазир сабаби зиёд шудани шумораи муҳоҷирони ғайриқонуниро, ки дар ин кишвар ба як буҳрон печидааст, Беларусро гунаҳкор ҳисобида президент Лукашенкоро ба қоҷоқи ғайриқонунӣ муттаҳам донист.
Охири моҳи май президенти Беларус, Александр Лукашенко таҳдид кард, ки назоратро бар болои қочоқ ва муҳоҷирати ғайриқонунӣ дар робита ба фишори Арвупо ба Минск (пас аз ҳодисаи ҳавопаймои “Ryanair”) суст мекунад.
Тибқи маълумоти Вазорати корҳои дохилии Литва, аз аввали соли ҷорӣ 3832 муҳоҷир ғайриқонунӣ аз марзи Беларус ба хоки Литва ворид шудаанд, ки назар ба соли 2020 якчанд маротиба зиёдтар аст.
Мақомоти Литва ҷалби муҳоҷирони ғайриқонуниро усули ҷанги гибридӣ аз сӯи Беларус ба Иттиҳоди Аврупо номид.
Тибқи маълумоти Вазорати умури дохилии Литва, ки Хадамоти марзбонӣ тобеи он аст, дирӯз 3 – август ҳудуди 180 муҳоҷирро, ки аксари онҳо шаҳрвандони Ироқ ҳастанд, ба сарҳади Беларус бозпас гардонида шуданд.
