Мақомоти Русия як муҳоҷири 32-солаи тоҷикро дар шаҳри Маскав бо иттиҳоми ҷосусӣ барои Украина дастгир карданд.
Бино ба иттилои расонаҳои русӣ, Шарифҷон Тиллозода, зодаи шаҳри Панҷакенти Тоҷикистон дар ҳудуди як қисми низомии баста боздошт шудааст. Кормандони ин қисми низомӣ дар аввал гумон карданд, ки ӯ мардикор асту роҳашро гум кардааст, вале маълум шудааст, ки гӯё “ӯ акс гирифта, ба кураторҳои худ ба хориҷ мефиристодааст”.
Дар ҳамин ҳол, Телеграм-канали додгоҳҳои шаҳри Маскав хабар дод, ки 10-уми октябри соли ҷорӣ додгоҳи ноҳияи Лефортово дар мурофиае, ки пушти дарҳои баста гузашт, як шаҳрванди Тоҷикистонро бар асоси моддаи 275 Кодекси ҷиноятии Русия ба ҷосусӣ айбдор намуда, ба муддати ду моҳ, яъне то 10 декабри соли ыорь ба ҳабси пешакӣ гирифт.
Ба иддаои мақомоти рус, тафтишоти пешакӣ исбот кардааст, ки Шарифҷон бевосита бо Хадамоти амнияти Украина тамос дорад. Дар ҳолати исботи иттиоми ҷосусӣ ба ин муҳоҷири тоҷик то 20 соли зиндон таҳдид мекунад.
То ҳол назари худи Шарифҷон, адвокат ва наздикону пайвандонаш дар ин бора дастраси расонаҳо нест.
Аммо, яке аз шиносҳои ин муҳоҷири тоҷик ба пойгоҳи хабари “Бомдод” гуфтааст, ки “ӯ як наргис аст, яъне одаме, ки худашро хеле ва хеле дӯст медорад. Шарифҷон дӯст медошт, ки шабу рӯз аз худаш аксу видео бигирад ва нашр кунад. Ҳар рӯз пахши мустақим дошт, ҳар рӯз аксу видеоҳо мегузошт. Агар ӯ ҷосус бошад, пас ман попи Румам”.
Инчунин Шарифҷон Тиллозода борҳо бо шиорҳои тарафдори аз Русия ва Путин дар саҳфаи фейсбукиаш акс нашр карда буд.
Дар ҳамин ҳол як манбаъ ба “Бомдод” хабар додааст, ки мақомот рӯзи 18-уми сентябри соли ҷорӣ ахиран ба зидди Тиллозода дар Тоҷикистон бар асоси моддаи 401 Кодекси ҷиноятии Тоҷикистон бо иттиҳоми иштирок дар ҷангҳо дар кишварҳои дигар парванда кушоданд.
“Рӯзи 15 сентябри соли 2023 ӯ баногоҳ дар Фейсбукаш видео нашр кард ва хабар дод, ки аз машқҳои ҳарбӣ гузашт ва акнун ба саффи артиши Украина мепайвандад. Видео ва аксҳо ҳам аз як урдугоҳи ҳарбӣ буд, ки сарбозон онҷо дар хаймаҳои ҳарбӣ шабро рӯз мекарданд. Тиллозода ин видео ва аксҳоро алакай баъди як рӯз пок кард, вале кормандони мақомот онҳоро алакай сабт карда гирифтанд“- мегӯяд манбаи “Бомдод”.
Мақомоти Тоҷикистон то ҳол дар бораи боздошти Шарифҷон Тиллозода дар хоки Русия ва боз шудани парвандаи ҷиноятӣ нисбати ӯ дар ин кишвар чизе нагуфтаанд.
