Мақомоти шаҳри Исфара шумори дақиқи хонаҳои харобу валангоршудаи сокинони ин шаҳрро, ки дар натиҷаи даргириҳои мусаллаҳонаи рӯзи 28 ва 29 апрел пурра ва ё қисман аз байн рафтанд, мушаххас кард.
Пас аз таҳқиқи комиссияи вижае, ки аз ҷониби ҳукумати шаҳри Исфара тартиб дода шуд, маълум гашт, ки дар умум 55 манзили сокинони наздимарзӣ хароб шудаанд. Аз ин шумор 17 манзил пурра ва 38 хонаи дигар қисман хароб шудаанд, ки ба таъмир ниёз доранд. Дар ин бора Зубайдулло Шамолов, иҷрокунандаи вазифаи сухангӯи раиси шаҳри Исфара ба “Sputnik Тоҷикистон” хабар дод.
Тибқи омори пешниҳодкардаи ҳукумати шаҳри Исфара 15 хона ба Ҷамоати деҳоти Ворух, 6 – то ба Ҷамоати деҳоти Сурх, аз Ҷамоати деҳоти Шаҳрак 5- то ва аз Ҷамоати деҳоти Чоркӯҳ бошад 29 хона пурра хароб ва ё қисман зарар дидааст, – омадааст дар хабар.
Ба гуфтаи манбаъ, дар баробари хонаҳои харобшуда як иншооти ёрирасон низ дар шаҳри Исфара зарар дидааст.
Гуфта мешавад, ки ҳоло комиссияи вижаи Кумитаи ҳолатҳои фавқулоддаи Тоҷикистон дар ҷамоатҳои мазкур зарари даргириҳоро ҳисоб доранд ва эҳтимол меравад, ки ин омор боз ҳам тағйир ёбад.
Ёдовар мешавем, ки рӯзи 29 апрели соли ҷорӣ байни сокинони наздимарзии Тоҷикистону Қирғизистон дар Ҷамоати Хоҷаи Аълои шаҳри Исфара даргирӣ оғоз шуд, пас аз чанде низомиён вориди ҷанг шуданд, ки дар натиҷа талафоти ҷонӣ ва молӣ аз ду ҷониб зиёд шуд.
Ду кишвар як дигарро барои оғози тирандозӣ муттаҳам мекунанд. Прокуратураи генералии Қирғизистон рӯзи 3 май ҷониби Тоҷикистонро ба ҳуҷуми мусаллаҳона айбдор кард. Ҳамчунин Прокуратураи генералии Тоҷикистон як рӯз пас аз он низ ҷониби Қирғизистонро дар шуруи даргирҳо айбдор донист.
