Рӯзи 22 феврал дар ноҳияи Лайлаки вилояти Бодканд намояндагони сохторҳои интизомӣ ва марзбонии ду кишвар, Қирғизистону Тоҷикистон бо ҳам дидору гуфтугӯ намуданд.
Бино ба иттилои бахши қирғизии Раидиои Озодӣ намояндаи ҳукумати Қирғизистон дар Бодканд Омурбек Суваналиев гуфта, ки вохӯрии ҷонибҳо бо ташаббуси ҷониби Қирғизистон сурат гирифта, дар он табодули шаҳрвандони боздоштшудаи ду кишвар баррасӣ шудааст.
“Гуфтугӯҳо баргузор шуданд. Мо натиҷаҳоро мунтазир ҳастем. Ин масъалае нест, ки зуд ҳал шавад. Барои ҳалли баъзе аз масоил дар марз бояд аз дипломатҳо низ истифода шавад”, – менависад Радиои Озодӣ аз қавли Суваналиев.
Ба гуфтаи мақомоти Қирғизистон, аз аввали соли равон марзбонони тоҷик беш аз 20 шаҳрванди Қирғизистонро бо гумони убури ғайриқонунии марз дастгир кардаанд.
Ёдовар мешавем, ки 22 феврал дар вилояти Бодканди Ҷумҳурии Қирғизистон сокинон бо талаби раҳоии 5 боздоштшудаи қирғиз аз ҷониби КДАМ-и Тоҷикистон раҳпаймоӣ карданд.
Гуфта мешавад, ин 5 шаҳрванди Қирғизистон рӯзи 16 феврал бо гумони убури ғайриқонунии марз аз ҷониби Кумитаи давлатии амнияти миллии Тоҷикистон боздошт шуданд. Бино ба навиштаи хабаргузории қирғизии “24.kg” се нафари онҳо зодагони ноҳияи Қадамҷай ва ду нафар аз Ботканд мебошанд. Пайвандони боздоштшудаҳо гуфтаанд, то ҳол маълум нест, ки онҳо дар куҷо нигаҳдорӣ мешаванд ва аз ҳолашон хабар надоранд.
Ин шаҳрвандон ҳангоми интиқоли 900 кг металл, 2 сар гов ва 3 сар моли майда боздошт шуданд.
