Кумитаи дини Тоҷикистон торихи нави эҳтимоли кушодашавии бузургтарин масҷиди Тоҷикистонро, ки бо сармояи давлати Қатар сохта шудааст, эълон кард.
Сулаймон Давлатзода, раиси Кумитаи дин, танзими анъана ва ҷашну маросими миллии Тоҷикистон, рӯзи 3-юми феврал дар нишасти матбуотии ниҳодаш ба хабарнигорон гуфт, ки дар семоҳаи дувуми имсол сафари ҳайати Қатар ба Тоҷикистон дар назар аст ва эҳтимол дар ҷараёни сафари ин гурӯҳ масҷид кушода шавад.
Ба гуфтаи Давлатзода, масҷид аз рӯи лоиҳаи дуҷониба бунёд шудааст ва ба ин хотир бояд бо ҳузури намояндагони ду кишвар боз шавад.
Дар нишасти матбуотии соли гузашта Сулаймон Давлатзод гуфта буд, ки бузургтарин масҷиди Тоҷикистон аз комиссияи давлатӣ гузашта ва омода аст дарҳои худро ба рӯи намозгузорон боз кунад.
Он замон раиси Кумитаи дин гуфта буд, ки ифтитоҳи масҷид моҳи марти соли 2020 пешбинӣ шуда буд, аммо ба далели пандемияи коронавирус намояндагони Қатар ба Точикистон омада натавонистанд ва ба ин далел кушодашавии масҷид ба таъхир афтод.
Сохтмони ин масҷиди бузурги кишвар расман соли 2009 бо сармоягузории давлати Қатар оғоз шуда буд, вале бо далелҳои зиёд то ҳол дарҳои худро ба рӯи намозгузорон боз накардааст. Гуфта мешавад, ин масҷиди бузург дар шаҳри Душанбе дар масоҳати 12 гектар сохта шуда, аз чаҳор манораи бузург бо баландии 65-метрӣ ва як гунбади асосии баландияш 47 метр ва боз 20 гумбади хурди дигар, инчунин толорҳои хурду калон барои нишасту вохӯриҳо ва қабули меҳмонон, китобхона, як осорхона ва ғайра иборат аст.
Қаблан хабар дода шуда буд, ки дар як вақт ҳудуди 120 000 нафар метавонанд дар ин масҷид намоз гузоранд.
Тибқи маълумотҳои расмӣ, ин масҷид ба маблағи 100 миллион доллари амрикоӣ сохта шудааст.
