Лионел Месси дигар бозингари Барселона (Барса) нест. Шартномаи қонунии ӯ бо клуби Каталония шаби 1-уми июл ба итмом расид. Барса кори худро барои шартномаи нав идома медиҳад, аммо ПСЖ мехоҳад шартномаро бо ӯро ба имзо расонад.
Барои аввалин бор дар кариераи касбиаш Лионел Месси бозигари Барселона нест. шаби 1-уми июли 2021 шартномааш бо клуби Каталония расман ба итмом расид. Дароз кардани мӯҳлати шартнома расман эълон нашудааст, аз ин рӯ, бозингари тими мунтахаби Аргентина дар мақоми агенти озод қарор дорад.
Ба навиштаи баъзе аз хабаргузориҳо Месси болои шартномаи нав фикр надорад ва дар ҳоли ҳозир ҳадафи асосиаш Ҷоми Амрико мебошад.
Ба навиштаи Eurosport, натиҷаи эҳтимолии ин ҳама сару садоҳо он аст, ки Барселона ва Месси билохира тамоми ҷузъиёти шартномаро ҳал карда, дар ниҳоят имзо шудани шартномаи навро эълон мекунанд.
Президенти Барселона Ҷоан Лапорта бовар дорад, ки Месси пойтахти Каталонияро тарк намекунад.
«Мо мехоҳем, ки ӯ бимонад – Лео низ инро мехоҳад. Гуфтушунидҳо хуб гузашта истодаанд.Ягона мушкил дар ФФП (финансовый фэйр-плей) аст ва мо дар ҳоли дарёфти роҳи ҳалли беҳтаре барои ҳарду ҷониб ҳастем ” – гуфт Лапорта дар суҳбат бо радиои El Transistor.
Дар бораи ҷузъиёти шартномаи нави Месси бо Барса маълумоти зиёд нест. Пештар дар расонаҳо хабар дарҷ шуда буд, ки созишнома барои ду мавсим баста мешавад ва маоши Лео ба таври назаррас коҳиш хоҳад ёфт.
Бино ба иттилои Cadena COPE, коҳиш ёфтани маоши Лео аз рӯи машваратҳое мебошанд, ки Барселона бо Ла Лигаи Испания анҷом додааст. Ла Лига аз вазъи нозуки иқтисодии Барселона, ки Ҷоан Лапорта пас аз гирифтани президентии Ҷозеп Бартомеу бо он рӯ ба рӯст, нигарон аст.
Президенти Ла Лига Хавиер Тебас клубро ҳушдор дода буд, ки агар онҳо ҳисобҳои молиявии худро коҳиш надиҳанд, наметавонанд бо Месси шартномаи навро ба қайд гиранд.
Қабл аз пандемия, музди меҳнати каталониҳо баландтарин дар Ла Лига буд – зиёда аз 600 миллион евро дар мавсим. Аммо аз он вақт инҷониб, ин маблағ тақрибан ду маротиба коҳиш ёфта, баробар ба 300 миллион евро шудааст.
Бино ба гузориши El Mundo Deportivo, ҳамчунин Барселона барои нигоҳ доштани Месси мехоҳад бо ду футболбоз шартномаи худро қатъ кунад, то ҳисобҳои молиявии худро коҳиш диҳанд. Ин футболбозон ҳимоятгар Самюэл Умтити ва нимҳимоятгар Миралем Пянич мебошанд.
Охирин шартномаи Месси бо ин клуб, ки соли 2017 ба имзо расида буд, чор солро дар бар мегирифт ва беш аз 500 миллион евро буд (маош, мукофотпулӣ ва ҳаққи истифода аз тасовир).
Барса, ки ҳаҷми умумии қарзи ӯ беш аз 1 миллиард евроро ташкил медиҳад, ин дафъа наметавонад чунин маблағро ба Мессии аргентинӣ пардохт кунад. Аммо ба гуфтаи Лапорта, ҷанбаи молии созишнома барои Лео муҳим нест – капитани Барса бештар манфиатдор аст, ки дар атрофи ӯ як дастаи рақобатпазир сохта шавад.
Сару садоҳо дар бораи гузаштани Месси ба дастаи Пари Сен-Жермен (ПСЖ) низ зиёд аст. Бештари расонаҳои хабарӣ гуфтаҳои Президенти ПСЖ Носир Ал-Ҳулайфиро мисол меоранд, ки дар аввали моҳи июни соли ҷорӣ дар мусоҳиба бо “L`Equipe” гуфта буд:
“Ман ба Лапорте гуфтам, ки қарордоди Месси ба охир мерасад, аз ин рӯ ҳамаи клубҳо ҳақ доранд бо ӯ сӯҳбат кунанд. Аммо ман ба ҷузъиёт нахоҳам рафт. Он чизе, ки ман гуфта метавонам, ин аст, ки ҳамаи футболбозони ситора мехоҳанд бо мо бипайванданд, аммо ман инро махсус нисбати Месси намегӯям. Ҳамаро овардан ғайриимкон аст, зеро мо аллакай бозигарони олӣ дорем. Аммо Месси футболбози афсонавӣ аст”.
Инчунин, бино ба иттилои Le Parisien, падар ва бародари Месси ӯро барои ба ПСЖ рафтан водор мекунанд. Музокирот барои бастани шартномаи нав тавассути падари Месси, ки ба ҳайси агенти ӯ амал мекунад, мегузарад.
Сабаби водор кардани Месси барои гузаштан ба ПСЖ, маоши пешниҳодкардаи клуби Фаронса мебошад. Маоши пешниҳодшуда нисбат ба оне, ки Месси тибқи шартномаи қаблӣ бо Барселона мегирифт, ба таври назаррас камтар аст. Аммо, аз маблағе, ки каталониҳо тибқи созишномаи нав пешниҳод кардаанд, зиёдтар.
Бино ба навиштаи Sport, бо рафтани Лионел Месси, Испания яке аз андозсупорандаҳои бузурги худро аз даст хоҳад дод. Дар маҷмӯъ, Лео пас аз бастани шартнома бо Барселона дар соли 2017 ба давлат 370 миллион евро андоз супурдааст.
Месси аз соли 2000 дар академияи дастаи Барселона буд ва расман аз соли 2003 ба ҳайси бозигари Барселона машғули вазифа аст.
Дар ҳайати каталониҳо, Месси даҳ маротиба чемпионати Испания, чор маротиба Лигаи чемпионҳо, 6 маротиба “туби тиллоӣ”, 6 маротибаи дигар “кафши тиллоӣ” ва чандин ҷоизаҳои дигарро ба даст овардааст.
