Варзишгари шинохтаи тоҷик Шаббос Неъматуллоев дар аввалин мусобиқаи байналмилалии бокси “Ҷоми Элорда” медали биринҷӣ ба даст овард.
Ин мусобиқаи байналмилалӣ рӯзҳои 30-юми июн то 5-уми июл дар шаҳри Нурсултони Қазоқистон баргузор гардида, дар он варзишгарон аз 10 давлати ҷаҳон ширкат мекунанд.
Шаббос Неъматуллоев, ки иштироккунанди Бозиҳои олимпии Токио-2020 мебошад, дар вазни -80 кг дар муҳорибаи аввалаш намояндаи Қазоқистон Баиржан Баигоншеков ва дар чорякфинал варзишгари Куба Салгадо Брайан Леонро шикаст дод. Аммо дар даври ниманиҳоӣ аз намояндаи Чин Танглатиан Аербеке шикаст хӯрда, ҷои сеюмро ишғол кард.
Варзишгари дигари тоҷик Хусравхон Раҳимов дар вазни 57 кг дар даври аввали ин мусобиқа аз варзишгари узбек Дилшод Абдумуродов шикаст хӯрда, аз ширкат дар даврҳои баъдӣ маҳрум шуд.
