5-уми август, Барселона эълон кард, ки Мессии 34-сола бинобар монеаҳои молиявӣ ва сохторӣ маҷбур аст, клубро тарк кунад.
Қарордоди Месси бо Барселона моҳи июли соли ҷорӣ ба поён расид. Дар саҳфаҳои расмии ин даста омадааст, ки бо вуҷуди алоқамандии зиёди тарафҳо, ки Месси дар Барселона(Барса) бимонад, ба далели “монеаҳои молӣ ва сохторӣ”-и марбут ба меъёрҳои лигаи футболи Испания, мондани Месси дар Барса ғайриимкон аст.
Тамдид нашудани қарордоди Месси ба коҳиши даромади “Барселона” рабт дорад. Ба навиштаи “Sports.ru”, Барса дар мавсими гузашта 671 миллион евро танҳо барои маоши футболбозон масраф кардааст ва бояд ин маблағ то ба 383 миллион евро коҳиш дода шавад.
Бо ба охир расидани қарордод, Месси розӣ шуда буд, ки дар клуби каталонӣ бо маоши кам боқӣ бимонад, аммо ӯ мемонд ё не, аз он вобаста буд, ки “Барселона” метавонад дигар бозигаронро фурӯшад ( ин ҳадди ақал як қисми монеаҳои молиявие мебошад, ки дар хабари расмӣ зикр шудааст).
Месси соли гузашта пеш аз ба охир расидани қарордодаш кӯшиш карда буд, ки Барселонаро тарк кунад, аммо дар ниҳоят тасмим гирифт, ки дар он бимонад.
Ситораи футбол бозии худро дар куҷо идома медиҳад то ҳол маълум нест. Қисме аз сомонаҳои варзишӣ мегӯянд, ки Месси метавонад ба дастаи “Манчестер Сити” -и Англия ба назди Пеп Гвардиола, ки солҳои 2008-2012 сармураббии “Барселона” буд, гузарад. Ҳамчунин қисме аз расонаҳо менависанд, ки Лео ба ПСЖ назди ҳамдастаи собиқи худ Неймар меравад.
То ҳол ягон бозигари Барса ба рафтани Месси вокуниш нишон надодааст. Ба навиштаи евроспорт танҳо ду вариант вуҷуд дорад: ё бозигарони Барселона аз ҳолати шок набаромада, бовар надоранд, ки ин ҳодиса рух додааст, ё назарияи мухлисон аст, ки Барселона бо ин амалаш мехоҳад болои президенти Ла Лига Хавер Тебас фишор орад ва Месси ҳеҷ куҷо намеравад.
Месси дар Барселона солона беш аз 90 миллион евро маош мегирифт. Маҷаллаи “Forbes” соли гузашта Леоро дар сархати феҳристи гаронарзиштарин футболбозони ҷаҳон қарор дода буд.
Лео Месси дар синни 13 -солагӣ ба Барселона омада буд. Вай аз соли 2004, яъне аз 17 солагӣ дар дастаи асосии Барселона бозӣ мекунад. Дар ҳайати каталониҳо, Месси даҳ маротиба чемпионати Испания, чор маротиба Лигаи чемпионҳо, 6 маротиба “туби тиллоӣ”, 6 маротибаи дигар “кафши тиллоӣ” ва чандин ҷоизаҳои дигарро ба даст оварда,дар тӯли ин 17 мавсим танҳо аз дастаи Барселона ба дарвозаи рақибон 672 гол задааст.
