Саломиддин Мирзораҳматов, яке аз мубаллиғони режими Эмомалӣ Раҳмон алайҳи Саъдӣ Маҳдӣ, директори Академияи воситаҳои ахбори омма ба Кумитаи давлатии амнияти миллӣ шикоят кардааст.
Саъдӣ Маҳдӣ, пештар декани факултети журналистикаи Донишгоҳи миллӣ буд ва ӯ низ аз таблиғгари сиёсатҳои режими Эмомалӣ Раҳмон шинохта шудааст, дар гурӯҳи фейсбукияш “Ормонҳои Миллӣ” хабар дод, ки Саломиддин Мирзораҳматов “ба унвони Раиси КДАМ мактуб навишта, талаб дорад, ки моро ҷазо диҳад”.
Вай илова мекунад: “Ҳама гап сари ҳамон 4 мисраи Давлат Сафар буд. Баъди баҳси зиёд ва тарафдор наёфтанаш, як муддате хомӯш буд. Фикр кардем, ки мӯйсафеди 70-сола ором шудааст! Аммо ҳайҳот, имрӯз ин кас ба унвони Раиси КДАМ мактуб навишта, талаб дорад, ки моро ҷазо диҳанд. Ин кас, ки худро журналист меҳисобад, аз раиси ниҳоди амниятӣ талаб дорад, ки сензура ҷорӣ кунад!
Баҳс аз он оғоз шуд, ки Саъдӣ Маҳдӣ рубоиеро аз Сафар Давлат, собиқ сардори Раёсати табъу нашри Вазорати фарҳанги ҷумҳурӣ дар гурӯҳи фейсбукии “Ормонҳои Миллӣ” ба нашр расонд, ки боиси вокуниши Саломуддин Мирзораҳматов ва дигарон шуд.
Рубоии нашршуда, ки дертар аз сафҳаи ин гурӯҳ ҳазф шуд, чунин аст:
“Фахрем, ки нангу ори миллат гаштем,
Аз рӯзи азал табори миллат гаштем.
Баъде ҳамаро, ки мо саворӣ кардем,
Кӯлобии гавсавори миллат гаштем.”
Саломиддин Мирзораҳматов дар матлабе дар шабакаи иҷтимоии Фейсбук зери унвони “ШОВИНИЗМИ МАҲАЛ” ин рубоиро зери танқид гирифт ва муаллифи онро ба маҳалгароӣ муттаҳам карда гуфт:
«Рубои»-и Давлат Сафар телевизиони «мардуми»-и соли 1992-ро ба ёдам овард. Як маҳал зидди дигар маҳал натанҳо бо яроқ, балки бо хабарҳои иғвоангез низ ҷанг мекард.
Ҳамазмон Мирзораҳмамтов он рубоиро нашр карда чунин суолгузорӣ кард:
ФАХРЕМ КИ НАНГУ ОРИ МИЛЛАТ ГАШТЕМ (Мардуми дигар маҳал ҳама бе нангу ор буданд!)
АЗ РӮЗИ АЗАЛ (?!) ТАБОРИ МИЛЛАТ ГАШТЕМ (Дар дигар маҳалҳои кишвар мардум аз тоҷик буданашон хабар надоштанд!)
БАЪДЕ ҲАМАРО, КИ МО САВОРИ КАРДЕМ (Ай мардуми бадбахту бечораи Зарафшону Бадахшон, Вахшонзамину Раштонзамин, Ҳисори Шодмон, Хуҷанду Истаравшану Конибодому Исфара ва дигар ноҳияҳои шимол! Шумо ҳатто харсавориро ёд надоштед! Шукр гӯед, ки…!)
Салмоддин Мирзораҳматов ҳамзамон бо хитобе ба Саймумин Ятимов талаб карда то муаллифи ин рубоӣ аз кор ронда шавад.
Муаллифи ин рубоӣ шоир, Давлат Сафар пас ин ҷанҷолҳо “шуҳрату” ҳам вазифаи нав дар блоки ҳукумати Эмомалӣ Раҳмон касб кард. Ӯ 5-уми июн бо Фаромни президент Эмомалӣ Раҳмон муовини вазири фарҳанги Тоҷикистон таъин шуд.
