Алксандр Петров шаҳрванди Русия шиносномаи бо номи шарҳрванди Молдова Николай Попа гирифтааш қалбакӣ буда, дар воқеъ чунин шиносномае бо номи ин шахс вуҷуд надоштааст. Дар ин бора рӯзи 20 апрел “Интерфакс” аз қавли масъулони Ожонсии хидматрасонии давлатии Молдова, ки хазинаи ҳама намуди ҳуҷҷатҳои Молдоваро нигоҳдорӣ мекунад, иттилоъ дод.
Ожонсӣ ба “Интерфакс” гуфта, ки шаҳрванд бо ному насаби Николай Попа, соли таваллудаш 18 июли соли 1979, дар Феҳристи давлатӣ сабти ном нашудааст ва шиноснома бо рақами A3194368 ба номи шахси дигаре дода шудааст, ки дар ҷои дигар ва таърихи таваллуди дигар аст.
Агентии хидматрасонии давлатии Молдова пас аз он, ки полиси Чехия рӯзи 17 апрел рӯйхати ҷустуҷӯии кормандони эҳтимолии Сарраёсати генералии Вазорати мудофиаи Русия Александр Петров ва Руслан Бошировро эълон кард, таҳқиқи худро дар мавриди ҳақиқат доштани Николай Попа ҳамчун шаҳрванди Молдова оғоз кард.
Мақомоти Ҷумҳурии Чехия онҳоро дар даст доштан дар ду таркиш дар анбори лавозимоти ҷангӣ дар моҳҳои октябр ва декабри соли 2014 гумонбар медонанд. Ҳамчунин ин афрод аз ҷониби мақомоти Бритониё дар заҳролудшавии Сергей ва Юлия Скрипалҳо дар Солсбери дар соли 2018 гумонбар дониста мешаванд.
Тибқи иттилои мақомоти Чехия, гумонбарон аз шиносномаҳои Русия ба номи Александр Петров ва Руслан Боширов, инчунин шиносномаи Молдова ба номи Николае Попа ва шиносномаи Тоҷикистон ба номи Руслан Табаров истифода кардаанд.
Гуфта мешавад, барои ба анбори силоҳ дар Чехия ворид шудан Табаров номаеро низ аз Вазорати дифои Тоҷикистон нишон додааст, ки ба онҳо иҷозати боздид аз анбори силоҳро дархост кардааст.
Аммо мақомоти Тоҷикистон рӯзи якшанбе гуфта буд, ки то рӯзи душанбе ҳақиқати шиносномаи Табаровро муайян намуда, эълон мекунад. Аммо то ҳол мақомот дар ин бора хомӯшанд.
Ёдовар мешавем, ки 17 апрел мақомоти Чехия дар бораи ихроҷи 18 дипломати рус қарор баровард. Ба иддаои Прага, кормандони хадамоти ҷосусии Русия дар зери пӯшиши дипломатӣ кор мекунанд. Мақомоти Чехия ин иқдомро пеш гирифтанд, зеро тибқи версияи онҳо, хадамоти махсуси Русия дар таркиши анбори лавозимоти ҷангӣ дар Ҷумҳурии Чехия дар соли 2014 даст доранд. Дар ин таркиш ду нафар ҷон дода буд.
Вазорати корҳои хориҷии Федератсияи Русия дар посух 20 корманди сафорати Чехия дар Маскавро “унсурҳои номатлуб” хонд ва барои онҳо як рӯз муҳлат дод то Маскавро тарк кунанд. 20 апрел Кремл гуфт, ки ҷониби Русия қасди тафтиши далели сафари шаҳрвандони Русия Александр Петров ва Руслан Боширов ба Чехияро дар соли 2014 надорад, зеро он айбҳои мақомоти Чехияро бемаънӣ мешуморад.
