Радиои Озодӣ навореро дар шабакаи фейсбукии худ нашр кард, ки дида мешавад ҳавопаймои Тоҷикистон аз Русия нимахолӣ ба Душанбе меояд.
Корбаре, ки наворро ба Радиои Озодӣ равон кардааст мегӯяд нархи билет каме бештар аз 30 ҳазор рубли русӣ аст. Дар ин навор гуфта мешавад, ки 2 хатсайрро якҷо намудаанд, вале бо ин ҳам ҳавопаймо нимахолӣ боқӣ мондааст.
Пештар муҳоҷирони корӣ аз он шикоят мекарданд, ки нархи билет то 50 ҳазор рубл боло рафтааст ва бо доштани нархи баланд, хидматрасонии ҳавопаймоҳои Тоҷикистон хусусан “Сомон Эйр” ба нархе, ки билетҳоро мефурӯшанд, ҷавобгӯ нест.
Чанде пеш корбаре ба “Аздо ТВ” низ навореро равон намуда, аз хидматрасонии бад ва нархи баланди чиптаҳои ширкати “Сомон Эйр”, ки ба Ҳасан Асадуллозода додараруси Эмомалӣ Раҳмон таллуқ дорад, шикоят карда буд.
Бо вуҷуди арзон шудани билетҳо чунин ба назар мерсад, ки муҳоҷирон ҳавопаймоҳои ширкатҳои тоҷикистониро таҳрим намуда, аз роҳҳои боз ҳам арзонтар истифода мебаранд.
Ёдовар мешавем, ки бо интишори коронавирус бештари давлатҳо марзҳояшонро бастанд, аз ҷумла Русия. Аз он замон шаҳрвандони Тоҷикистон аз онҷо берун ва ё баракс ворид шуда наметавонистанд.
Баъзе аз кишварҳои ҳамсоя хатсайрҳои доимиро бо Русия барқарор кардаанд, аммо Тоҷикистон ҳанӯз шаҳрвандонашро тариқи парвозҳои чартерӣ бо нархе хеле гарон ба Ватан меорад.
