Барои муҳоҷирони меҳнатӣ ва шаҳрвандони хориҷӣ дар Русия аз рӯзи 29-уми декабри соли равон қоидаҳои нав ҷорӣ мешавад.
Акнун муҳоҷироне, ки барои иқомати беш аз 90-рӯза ба Русия мераванд, бояд ба мақомоти корҳои дохилии ин кишвар санади нашъаманд набудан ва бемории вич надоштанро пешниҳод намоянд.
Хабаргузории ТАСС дар шарҳи ин хабар гуфтааст, муҳоҷирон бояд ин санадро 30 рӯз қабл аз анҷоми муҳлаташ пешниҳод кунанд. Дар сурати 18-сола набудан ва ё аз ҷониби суд ғайри қобили амал эътироф шудани шаҳрванди хориҷӣ метавонад ҳуҷҷатҳоро яке аз волидон ё парастори ӯ пешниҳод намояд.
Ҳамчунин агар маълумотнома бо забони хориҷӣ бошад, он бояд ба забони русӣ тарҷума ва дурустии он бояд ба таври нотариалӣ тасдиқ карда шавад.
Ҷорӣ шудани талаботи нав дар ҳолест, ки раиси Бонки марказии Русия Элвира Набиуллина яке аз сабабҳои болоравии босуръати нархи маводи ғизоиро дар камбуди муҳоҷирони корӣ медонад. Дар ин бора раиси Бонки марказӣ дар суханронии худ дар Думаи давлатӣ изҳор дошта буд. Ӯ иброз дошт, ки нарасидани кадрҳо ба афзоиши музди меҳнат дар хоҷагии қишлок таъсир расонд.
Гуфтанист, дар Русия зиёда аз як миллион шаҳрванди Тоҷикистон кору иқомат мекунанд ва ҳанӯз дақиқ нест, ки талаботи нав барои онҳо чӣ мушкилиҳои навро пеш меорад.
