Бино ба иттилои расмӣ, рӯзи 18-уми октябри соли 2023 Президенти Тоҷикистон Эмомалӣ Раҳмон бо Вазири дифоъ ва пуштибонии Неруҳои мусаллаҳи Эрон Муҳаммад Ризо Оштиёнӣ дар қасри Миллат мулоқот кард.
Сафари Вазири дифои Ҷумҳурии исломии Эрон Муҳаммад Ризо Оштиёнӣ ба Тоҷикистон ва мулоқоти ӯ бо Эмомалӣ Раҳмон ду рӯз пеш аз ин эълон шуда буд. Дар рафти ин мулоқот “масъалаҳои вобаста ба равобити Тоҷикистону Эрон ва дар ин зимн ҳамкориҳои ду кишвар дар соҳаи таъмини амният мавриди баррасӣ қарор гирифтанд.”
Аз сӯи дигар, ин мулоқоти Президенти Тоҷикистон бо Вазири дифои Эрон дар ҳоле сурат гирифта, ки Чин сарони 130 кишвари дунё, аз ҷумла Тоҷикистонро барои ширкат дар севумин Форуми байналмилалии тарҳи “Як камарбанд, як роҳ”-и худ даъват карда, ду рӯз боз ин нишасти ҷаҳонӣ дар Пекин идома дорад.
Эмомалӣ Раҳмон, ки худро борҳо аз дӯстони наздики Си Ҷин Пин, раҳбари Чин эълон кардааст, иштирок накардани ӯ дар нишасти Пекин суолҳоеро дар байни коршиносон ба вуҷуд овардааст. Аз ҷумла, гуфта мешавад, ки чиро Президенти Тоҷикистон мулоқот бо Вазири дифои Эронро болотар аз иштирок дар нишасти Чин дониста, ба Пекин нарафтааст?
Ҷумҳурии Исломии Эрон дар соли гузашта корхонаи тавлиди паҳподҳои Абобил 2-ро дар Тоҷикистон ифтитоҳ карда буд ва тибқи гуфтаҳои расонаҳои эронӣ, қарор аст имрӯз Вазири дифои Эрон аз ин корхона дидан кунад.
Гузоришҳои зиёде дар расонаҳои Тоҷикистон вуҷуд доранд, ки хеле аз корхонаҳое, ки бо дасти Эмомалӣ Раҳмон ифтитоҳ шудаанд, пас аз як рӯз ва ё як муддати кӯтоҳ фаъолияти онҳо аз кор мондааст. “Корхонаи тавлиди паҳподҳои Абобил 2”-и Эрон, ки як сол пеш дар Тоҷикистон ифтитоҳ шуда буд, дар чӣ шароите қарор дорад, номаълум нест.
