Сафири Ҷумҳурии Исломии Эрон дар Тоҷикистон, ки шоми дирӯз дар меҳмонии ҳамтои Арабистониаш буд, бо нашри чанд акс хушҳолии худро ба намоиш гузоштааст.
Шоми 10-уми апрели соли 2023 Муҳаммадтақии Собирӣ, сафири Ҷумҳурии исломии Эрон дар Тоҷикистон гуфт, “бо даъвати ҷаноби оқои Валид бин Абдурраҳмон Ар-Рушайдон, сафири муҳтарами Арабистони Саудӣ дар зиёфати ифтори эшон ширкат намудам.”
Сафири Ҷумҳурии исломии Эрон дар Тоҷикистон дар идома таъкид карда, ки ин “меҳмонӣ дар фазои самимӣ буд ва гуфтугӯҳои хубе анҷом шуд.”
Дар аксҳои нашршуда, дида мешавад, ки сафирони Арабистони Саудӣ ва Ҷумҳурии исломии Эрон дар як миз паҳлуи ҳам нишаста ва дар паҳлӯи рости сафири Арабистони Саудӣ раиси Макази исломии Тоҷикистон Сайидмукаррам Абдуқодирзода низ ҳузур дорад.
Инчунин дар ин миз, Сулаймон Давлатзода, раиси Кумитаи дин, танзими анъана ва ҷашну маросими миллии Тоҷикистон ва Файзулло Баротзода, раиси Маркази исломишиносии назди Президенти Тоҷикистон низ ҳузур дорад ва якҷоя ҳама даст ба дуо бардоштаанд.
Гуфта мешавад, бо дидани ин аксҳо ва чеҳраҳои шиносе, ки то чанд рӯзе пеш аз минбарҳои мухталиф алайҳи Ҷумҳурии исломии Эрон “сангпартоӣ” мекарданд, ҷолиб он аст, ки акнун бо баракати сулҳу оштии чинӣ, ки моҳи марти соли ҷорӣ барои ҳокимони Риёз ва Теҳрон ба армуғон овард, Саидмукаррам Абдуқодирзода, Сулаймон Давлатзода ва Файзулло Баротзода, се раҳбари минбарҳои таблиғотии ҳукумати Эмомалӣ Раҳмон ҳам ночор бо сафири Эрон сари як хон нишаста, бо табассумҳои “намакин” ба рӯи якдигар менигаранд.
