Иёлоти Муттаҳидаи Амрико дар нахустин мулоқоти сарони кишварҳои С5+1 ба конҳои азими маъданҳо ва сарватҳои зеризаминии Осиёи Марказӣ чашм дӯхт.
Бино ба иттилои расмӣ, 20-уми сентябри соли 2023 сарони кишварҳои Осиёи Марказӣ ва Иёлоти Муттаҳидаи Амрико дар ҳошияи мубоҳисаҳои 78-умин иҷлоси Сомзмони Милали Муттаҳид мулоқот карданд.
Ба қавли манбаъ, дар нахустини нишасти сарони кишварҳои Осиёи Марказӣ + Амрико “Иёлоти Муттаҳида пешниҳод кард, ки дар доираи C5+1 муколама оид ба коркарди конҳои азими маъданҳои Осиёи Марказӣ ва тақвияти бехатарӣ дар масъалаҳои ҳифзи сарватҳои зеризаминии муҳим, оғоз шавад.”
Дар ин нишаст, ки Президенти Амрико ҳамроҳ бо вазири умури хориҷаи ин кишвар бо сарони кишварҳои Тоҷикистон, Қирғизистон, Узбекистон, Туркманистон ва Қазоқистон мулоқот кард, масоили мухталифе дар заминаҳои амният, тиҷорат, иқтисод, сармоягузорӣ ва ғайра низ мавриди баррасӣ қарор гирифтааст.
Инчунин дар рафти мулоқот ҷонибҳо дар бораи “эҳтиром ба истиқлол ва тамомияти арзии ҳамаи кишварҳо ва раванди ислоҳоти идораи давлатӣ ва таъмини волоияти қонунро баррасӣ карданд.”
Аз сӯи дигар, Эмомалӣ Раҳмон дар мулоқот вазъи сиёсии Афғонистон ва ҳифзи сарҳади давлатии Тоҷикистон ва дар ин раванд ҳамкорӣ ва мусоидати шарикони байналмилалиро зарур донистааст.
Гуфта мешавад, нахустин нишасти сарони кишварҳои Осиёи Марказӣ бар иловаи Амрико, маъруф ба С5+1 бо даъвати Ҷо Байден, Президенти Амрико дар ҳошияи мубоҳисаҳои 78-умин иҷлоси Сомзмони Милали Муттаҳид дар шаҳри Ню-Йорк баргузор шуд.
