Президенти Тоҷикистон Эмомалӣ Раҳмон бо вазири корҳои хориҷии Арабистони Саудӣ, шоҳзода Файсал ибни Фарҳон Оли Сауд мулоқот кард.
Бино ба иттилои Хадамоти матбуоти Президенти Тоҷикистон, 3-уми октябри соли 2022 Эмомалӣ Раҳмон, Президенти Тоҷикистон шоҳзода Файсал ибни Фарҳон Оли Саудро дар шаҳри Душанбе дар Қасри Миллат ба ҳузур пазируфт.
Ба қавли манбаъ, ҷонибҳо дар рафти ин мулоқот “ба масъалаи татбиқи босамари стратегияҳои миллии Тоҷикистону Арабистони Саудӣ, аз ҷумла Стратегияи миллии рушди Тоҷикистон барои давраи то соли 2030 ва Стратегияи “Дидгоҳи – 2030”, ки бар нафъи мардумони ҳар ду кишвар амалӣ мегарданд, таваҷҷуҳ зоҳир карданд.”
Гуфта мешавад, ҳамчунин дар ин мулоқот дар мавриди “фаъолгардонии кори Шӯрои ҳамкории кишварҳои арабии Халиҷ ва Осиёи Марказӣ, Комиссияи муштараки ҳамкории иқтисодию тиҷоратӣ ва илмию техникӣ, Анҷумани соҳибкорони Тоҷикистону Арабистони Саудӣ ва Шӯрои соҳибкорони ду кишвар”, баррасӣ шудааст.
Ин сафари шоҳзода Файсал ибни Фарҳон дар раъси як ҳайъате ба Тоҷикистон аз қабл эълон нашуда буд. 2-уми октябри соли ҷорӣ дар торихи муносибатҳои 30-солаи Тоҷикистон ва Арабистони Саудӣ барои нахустин вазири корҳои хориҷии Саудӣ бо сафари расмӣ ба Тоҷикистон омад.
