Кормандони Агентии назорати маводи нашъаовари Тоҷикистон ҳудуди 15 кг ҳабҳои психотропии навъи “метамфетамин” мусодира намуданд. Барои ин ду шаҳрванди Афғонистонро боздошт карданд.
Бино ба иттолии Агентӣ, 7-уми ноябри соли ҷорӣ аз ҷониби кормандони оперативӣ дар шоҳроҳи Ҷайҳун-Панҷи Поён ду шаҳрванди Афғонистон Салоҳиддин Валади Боймат ва Маҳмадсаҳи валади Холмуҳаммад боздошт шуданд.
Зимни кофтукоб аз боздоштшудагон 15 зарфи пластикӣ мусодира гардид, ки дар дохили он бастаҳои селофанӣ бо маводҳои кристалии рангашон сафед мавҷуд буд. Тафтишот нишон дод, ки маводи дарёфтшуда ҳабҳои психотропии навъи “метамфетамин” буда, вазни умумии он 14 килограмму 850 граммро ташкил медиҳад.
Манбаъ мегӯяд, аз рӯи ин ҳодиса тибқи моддаҳои 200 қисми 4 банди “д”, 335 қисми 2 ва 289 қисми 3 Кодекси ҷиноятии Ҷумҳурии Тоҷикистон парвандаи ҷиноӣ оғоз гардида, тафтишот идома дорад.
