25-уми августи соли равон кормандони гумруки Ӯзбекистон дар марз бо Тоҷикистон наздики 100 кг маводди мухаддирро аз як мошини боркаш мусодира кардаанд.
Маъмурони гумруки Ҷумҳурии Ӯзбекистон дар нуқтаи марзии “Сариосиё”, ки бо Тоҷикистон ҳамарз аст, аз як мошини боркаши навъи “Merсedes-Benz” наздики 100 кг маводди мухаддири навъҳои ҳероин ва ҳашиш пайдо ва мусодира карданд. Дар ин бора Кумитаи давлатии гумруки Ҷумҳурии Узбекистон хабар дод.
Дар хабар гуфта мешавад, ки ин миқдори бузурги маводди мухаддир аз мошини боркаше, ки ба шаҳрванди “кишвари ҳамсоя” тааллуқ дошт, пайдо шудааст. Аммо аз қочоқгар ном бурда нашудааст ва инчунин шаҳрванди кадом кишвари ҳамсоя будани онро низ мақомоти Ӯзбекистон зикр накарданд.
Кумитаи гумруки Ӯзбекистон мегӯяд, ин мошини боркашро соати 03:30 субҳи 25 август дар гузаргоҳи “Сариосиё” боздошт карданд.
Инчунин иттилоъ дода мешавад, ки чанде пеш кормандони гумрукии сарҳадии “Сариосиё”-и Раёсати гумруки вилояти Сурхондарё як чунин кӯшиши интиқоли миқдори зиёди маводи мухаддирро ошкор кардаанд.
Кумитаи гумруки Ӯзбекистон мегӯяд, ронанда дар аввал гуфта, ки дар мошин 20 тонна ришта дорад, аммо баъд аз тафтиш бо кумаки саги таълимдида муайян шуд, ки дар байни риштаҳо 93 бастаи пластикии маводди мухаддир ҷойгузорӣ шудааст.
“Ҳангоми кушодани бастаҳои ёфтшуда маълум шуд, ки дар 82 бастаи ранги сабз ва сурх маводи нашъадори навъи ҳероин ба миқдори 85 килою 505 грамм ва дар 11 бастаи дигар бо ранги зард маводи нашъадори навъи ҳашиш ба миқдори 11 кило 425 грам пайдо ва мусодира шуд.”- омадааст дар хабар.
