Музокироти ИМА ва Украина, ки 11-уми марти соли ҷорӣ дар шаҳри Ҷиддаи Арабистони Саудӣ баргузор гардид ва беш аз ҳашт соат идома кард, ба охир расид.
Дар натиҷаи ин музокирот, Киев омодагии худро барои қабули пешниҳоди Амрико дар бораи ҷорӣ кардани оташбаси муваққатии 30-рӯза бо имкони тамдиди он изҳор доштааст.
ИМА дар баробари ин табодули иттилоот ва кумакҳои амниятӣ ба Украинаро фавран азсар мегирад.
Марко Рубио, котиби давлатии Амрико, ки бо мушовири амнияти миллӣ Майк Волтс Амрикоро дар музокирот намояндагӣ мекард, гуфт, ки тарҳи оташбас барои тасмимгирӣ ба ҷониби Русия пешниҳод мешавад ва умед дорад, ки русҳо ҳарчи зудтар “бале” бигӯянд, то ҷонибҳо ба марҳилаи дувум, яъне музокироти воқеӣ гузаранд.
Рубио ичнунин таъкид кард, ки агар Маскав ин таклифро рад кунад, пас худро монеаи хақиқӣ дар роҳи сулҳ нишон хоҳад дод.
Пас аз ин нишаст президенти ИМА Доналд Трамп низ изҳори умедворӣ намуд, ки Русия ба оташбас розӣ шавад ва хабар дод, бо Владимир Путин, раиси ҷумҳури Русия қасд дорад гуфтугӯ кунад. Эҳтимол меравад, гуфтугӯи Трамп бо Путин давоми ҳафтаи ҷорӣ анҷом шавад.
Дмитрий Псков, сухангӯи Кремл низ эҳтимол додааст, ки суҳбати телефонии раҳбарони Русия ва Амрико рӯзҳои наздик баргузор хоҳад шуд ва ҷониби тафсилоти музокирот аз ҷумла пешниҳоди оташбаси 30-рӯзаро аз ИМА бигирад.
Ҳамзамон Трамп гуфт, ки Владимир Зеленскийро дигарбора ба Кохи Сафед даъват хоҳад кард.
Гуфта мешавад, дар ҷараёни музокирот дар Ҷидда ҷонибҳо табодули асирони ҷангӣ миёни Киеву Маскав ва баргардонидани кӯдакони иҷборан оворашудаи украиниро баррасӣ карданд ва Амрико вазифадор шудааст, ки ин пешниҳодҳои мушаххасро бо намояндагони Русия баррасӣ кунад. Ҷониби Украина ба ҳузури кишварҳои урупоӣ дар нишастҳои баъдӣ таъкид кардааст.
Дар пайи музокироти Украина ва Иёлоти Муттаҳида дар Арабистони Саудӣ, ҷонибҳо инчунин ба мувофиқа расиданд, ки дар бораи истихроҷи муштараки маъданҳои Украина ҳарчи зудтар созиш ба имзо расонанд. Ин созишнома бояд 28-уми феврали соли ҷорӣ миёни Зеленский ва Трамп дар Кохи Сафед ба имзо мерасид, вале гуфтугӯи онҳо бо ҷанҷолҳои лафзии сахти раҳбарони ду кишвар анҷомид ва Зеленский маҷбур шуд бидуни имзои созишнома Вашингтонро тарк кунад.
Аз натиҷаҳои музокироти Украина ва Амрико худи Владимир Зеленский ва раҳбарони кишварҳои урупоӣ хуб истиқбол карда, таъкид кардаанд, ки ҷонибдори сулҳи устувор ва дарозмуддат бо кафолатҳои амниятӣ барои Украина мебошанд.
