Гурӯҳи коршиносони Созмони ҷаҳонии беҳдошт, ки аз 28 январи соли ҷорӣ барои таҳқиқи маншаъи вируси корона ба Вуҳони Чин сафар карда буданд, дирӯз 10 феврал кори озмоишии худро ба анҷом расонданд.
Давоми ду ҳафта таҳқиқу озмоиш ба чунин хулоса расиданд: “намедонем корона аз куҷо омадааст, аммо медонем аз куҷо наомадааст”.
Бино ба гузориши ВВС-и форсӣ коршиносон дар нишасти матбуотие ба рӯзноманигорон гуфтанд, “Натавонистем ҳеч ҳайвонеро ба унвони ҳомили ин беморӣ шиносоӣ кунем ва ин вирус дар ҳеч навъи ҳайвонот дар Чин ба таври густарда шоеъ набудааст”.
Баъзе бар ин назаранд, ки маншаъи вируси корона як озмоишгоҳе дар Вуҳон аст, ки пештар болои гунаҳои ин вирус таҳқиқ мекардааст. Аммо коршиносони Созмони ҷаҳонии беҳдошт баъд аз таҳқиқи худ ин фарзияро рад карданд.
Гурӯҳи коршиносони СҶБ мегӯянд, эҳтимол дорад ин вирус тариқи маҳсулоти хӯрокворие, ки аз хориҷи Чин ба ин кишвар ворид мешавад, дар Вуҳон пайдо шуда бошад. Ҳамон назарияст, ки чандест худи ҳукумати Чин онро таблиғ дорад.
Ин боис шудааст, ки баъзеҳо мустақил будани ин ҳайати коршиносони СҶБ-ро зери суол бибаранд.
Амрико мегӯяд, агарчи мо дубора ба ин созмон пайвастем, вале дар барномарезӣ ва таҳқиқи ин барнома неқше надоштем. Эҳтимол меравад хулосаи таҳқиқи ин ҳайатро аксари давлатҳо напазиранд.
