Пойгоҳи хабарии “Памир Дайли Нюс” бо нашри наворе иддаъо кардааст, ки Гулбиддин Зиёбековро пеш аз қатлаш чанде аз мақомоти амниятӣ ҳалқовез карда, кашида бурданд.
Дар навор, ки гуфта мешавад, он замони қатли Гулбиддин Зиёбеков дар деҳаи Тавдеми ноҳия Роштқалъаи ВМКБ бардошта шудааст, дида мешавад, ки чанд нафар низомипӯшон мардеро иҳота кардаанд, ки дар замин афтодаву дар гарданаш ресмоне баста, низомипӯшон ӯро кашола карда бо доду фарёд мебаранд.
Ин навор, ки дар саҳфаҳои фейсбукӣ ва телеграмии “Памир Дайли Нюс” нашр шудааст, бо вокунишҳои зиёди корбарон рӯбарӯ шуда, то кунун садҳо маротиба дар дигар саҳифаҳои кобарон бознашр гардидааст.
Ин ҳам дар ҳолест, ки бо гузашти қариб як шабонарӯз аз нашри ин навор дар Интернет мақомоти Тоҷикистон расман то ҳол дар бораи он изҳори назар накардаанд, аммо чанде аз чеҳраҳои ношинос ва фейкҳое, ки аксаран аз сиёсатҳои ҳукумат пуштибонӣ ва талош мекунанд хеле аз ҷиноятҳои мақомотро тавҷеҳ кунанд, ба шубҳпароканӣ оғоз карда, иддаъо доранд, ки навор ҷаълӣ аст, аммо корбарони дигар ин даъвои онҳоро рад карда, фейкҳоро ба дурӯғпарокӣ муттаҳам мекунанд.
Гулбиддин Зиёбеков рӯзи 25-уми ноябр тавассути мақомоти қудратӣ дар деҳаи Тавдеми ноҳияи Роштқалъа аз хонааш боздошт ва тавассути мақомот бо зарби 7 тир дар роҳ ба қатл расид. Модараш ҷасади писарашро ба назди бинои раиси вилоят дар майдони Исмоили Сомонии шаҳри Хоруғ бурд ва хост аз раҳбрият вилоят пурсад, ки чаро писараш бо чунин шевае пурдаҳшат ба қатл расониданд?
Ҳодисаи қатли Гулбиддин Зиёбеков ва додхоҳии модари ӯ боис шуд, ки садҳо нафари дигар ба рикоби онҳо ҳамроҳ шуда, садои эътирозхои худро баланд кунанд, аммо дар посух мақомот боз ҳам болои гирдиҳам омадагон оташ кушоданд ва дар натиҷа 2 нафари дигар кушта ва 17 тани дигар захмӣ ва барои муддатҳои номуайн маъюб шуданд.
Мақомоти Тоҷикистон аз рӯзи аввали ҳодиса талош карданд, ки тамоми тамосҳои электронӣ бо ин вилоят, бахусус ноҳияҳои Роштқалъа, Ишкошим, Рӯшон, Шуғнон ва маркази маръумурии вилоят шаҳри Хоруғро қатъ кунанд, то сокинон натавонанд ҷомеаро бо ахбори алтернативӣ таъмин ва аз ҷиноятҳои мақомот дар ин минтақа парда бардоранд.
Гуфтанист, қатъи Интернет ва дигар намуди тамосҳои электронӣ боварии мардумро нисбат ба мақомот ва ҳукумати марказӣ дар пойинтарин дараҷа қарор дода, дар замони асри табодули иттиллот ва тиҷорат тавассути Интернет ба мушкилоти мардум афзуда, нигаронии наздикону пайвандони онҳоро зиёдтар кардааст.
