Мақомоти Туркия мегӯянд, ки давоми рӯз дасти кам се маротиба заминҷунбиҳои ҷадиде бо бузургии аз 4,1 то 5 дараҷа шимолу шарқи ин кишварро такон додааст.
Субҳи имрӯз, 11-уми феврали соли 2023 оморҳои расмӣ аз Турия ва Сурия аз он ҳикоят доранд, ки теъдоди қурбониёни ин ҳодисаҳои ғамангез беш аз 26 ҳазору 330 нафарро ташкил дода ва ин омор дар ҳоли афзоиш аст.
Тибқи охирин оморҳо, теъдоди қурбониёни дар Туркия 21 ҳазору 842 нафар ва шумори захмиҳо ба 80 ҳазору 104 каси дигар расидааст. Аммо ин омор дар Сурия 4 ҳазору 487 кушта ва 7 ҳазор 396 маҷруҳро ташкил медиҳад.
Кумитаи ҳолатҳои фавқулъода ва мудофиаи граждании Тоҷикистон эълон кард, ки гурӯҳи наҷоти кишварамон, ки дирӯз вориди Қаҳрамонмараш шуда буданд, субҳи имрӯз як тифли 6-моҳа ва падарашро аз зери оворҳои ба ҷо монда аз заминларза зинда берун бароварданд. “Ин ду нафар зери вайронаҳо муддати 6 рӯз зинда монда буданд.“
Зиёда аз 100 ҳазор нафар дар гурӯҳҳои наҷоти беш аз 70 кишвари дунё ва фаъолону хайрхоҳони турк ва сокинони ин кишвар корҳои ҷустуҷӯ ва наҷоти мардумони зери оворҳоро дар Туркия идома медиҳанд ва лаҳзаҳа ба лаҳлаза талош доранд, ки ҷони мардумро наҷот диҳанд.
Аммо бархе сокинони Сурия бо роҳандозии иқдомҳои кумакхоҳӣ аз тариқи расонаҳо ва шабакаҳои иҷтимоӣ мегӯянд, бо гузашти 6 шабонарӯз аз ин ҳодисаҳои мудҳиш ҳамоно ҳам ҳеч гурӯҳи наҷоте аз давлатҳои дунё ба кумаки онҳо наомадааст. Имоконоташон хеле кам ва тавоноиҳояшон ҳам маҳдуд аст, ба ҳамин хотир наметавонанд сари вақт ҷони афроди зери вайронаҳоро наҷот диҳанд.
Бо ин вуҷуд ахбору гузоришҳое аз Турия ва Сурия тариқи расонаҳо ва шабакаҳои иҷтимоӣ нашр мешаванд, ки ҳикоят аз наҷоти дасти кам 20 нафарро дар ҳамин рӯз доранд. Дар байни онҳо аз кӯдаки шашмоҳа то пири 72-сола ҳам вуҷуд дорад.
Гуфта мешавад, бар асари заминларзаҳои шадиде, ки субҳи 6-уми феврали соли ҷорӣ Турия, Сурия, Ироқ, Лубнон, Юнон ва Қибрису Мисрро такон дод, тибқи оморҳои расмӣ зиёда аз 24 ҳазор нафар кушта ва ҳудуди 90 ҳазор каси дигар маҷруҳ шуд. Дар бораи онҳое, ки беному нишон зери вайронаҳо мондаанд, омори дақиқе вуҷуд надорад.
Дар ҳоле, ки даҳшату ваҳшати ин ҳодиса ҳамоно идома дорад ва мардумро ба худ наовардааст, бархе муҳаққиқон бахши заминшиносӣ ва зилзиласанҷӣ мегӯянд, ки эҳтимол меравад ба наздикӣ ҳамчунин заминҷунбии шадиде қисматҳое аз Афғонистону Покистон ва Ҳиндустонро ҳам такон хоҳад дод.
