Мақомоти қудратии Тоҷикистон аз баъзе муҳоҷирони кории тоҷик дар кишварҳои аврупоӣ хостаанд, ки ба Ватан баргарданд ва дар ҳолати барнагаштан бар зидди онҳо парванда боз мешавад.
Азим Якин, як корбари Фейсбук бо нашри наворе дар саҳифааш аз таъқиби мақомоти қудратӣ изҳори нигаронӣ кардааст. Ин корбар мегӯяд, шуъбаи кофтукоби ҷиноятии ВКД дар ноҳияи Дарвоз алайҳи ӯ бо моддаҳои 187 ва 307-и Кодекси ҷиноятии Ҷумҳурии Тоҷикистон парвандаи ҷиноятӣ боз кардаанд, вале худи ӯ намедонад гуноҳаш чист.
Ба гуфтаи ин шаҳрванд падарашро мақомот даъват намуда гуфтаанд, ки фарзанди Шумо шомили кадом ҳизбу ҳаракатҳост ва ӯ бояд ба Тоҷикистон баргардад. Худи Азим мегӯяд, шомили ҳеч ҳизбу ҳаракате нест ва ҳеч гуноҳе ҳам накардааст, аммо намедонад мақомот барои чи алайҳаш парвандаи ҷиноятӣ боз кардаанд.
Азим Якин дар сӯҳбат бо “Аздо тв” гуфт, мақомот бори аввал нест, ки алайҳи ӯ парванда боз мекунанд, чанд соле пеш парванда бо иттиҳоми пайравӣ аз ҷараёни Салафия боз карда буданд, аммо вақтҳои охир таъқибу фишорро болои хонаводааш бештар кардаанд.
Дар ҳамин ҳол яке аз муҳоҷирони дигар, ки нахост номаш зикр шавад, дар сӯҳбат бо “Аздо тв” гуфт, ӯ бо раводид ба кишварҳои Аврупоӣ рафта ва паноҳанда несту моили ҳеч ҳаракати сиёсӣ низ. Танҳо барои кор рафтааст, аммо мақомоти қудратии вилояти Хатлон ба хонаи онҳо рафта волидайнашро маҷбур доранд, ки фарзандатонро бигӯед ба кишвар баргардад ва дар акси ҳол бар зидди ӯ парвандаи ҷиноятӣ боз мешаваду дар пайгард қарор хоҳад гирифт.
Ин ҳамсӯҳбати мо мегӯяд, ки намедонад барои чӣ мақомот мехоҳанд аз Аврупо баргардад, дар ҳоле, ки ҳеч фаъолияти сиёсие надорад ва ҳатто дар шабакаҳои иҷтимоӣ чандон фаъол ҳам нест.
Ба ҳамин монананд чанд муҳоҷири дигар ҳам шикоятҳо кардаанд, ки вақтҳои ахир мақомот болои хонаводаи онҳо фишор оварда талаб доранд фарзандонашон баргарданд.
