Вокуниши қирғизҳо ба хабари фурӯши паҳподҳои “Bayraktar TB2” ба Тоҷикистон

Дар пайи нашри ин хабар Кумитаи давлатии амнияти миллии Қирғизистон бо нашри баёнияе фурӯши паҳподҳои “Bayraktar TB2” Туркия ба Тоҷикистонро рад кард.

“Тибқи маълумоти дақиқи мавҷуда, ҷониби Тоҷикистон бо истеҳсолкунандаи ҳавопаймои “Байрактар”, ширкати “Байкар Макина” ва ҳамчунин бо дигар ширкатҳои тавлидкунандаи паҳподҳои туркӣ барои харидории ҳавопаймоҳои бесарнишин шартнома набастааст”, омадааст дар баёнияи матбуотии КДАМ-и Қирғизистон.

Як дипломати тоҷик, ки нахост номаш зикр шавад, дар тамос бо Azda tv фурӯши паҳподҳои туркӣ ба Тоҷикистонро тайид намуд, вале аз додани ҷузъиёти бештар худдорӣ кард.

Ин манбаъ гуфт, ки “Туркия паҳподҳои “Bayraktar TB2”-ро ба Тоҷикистон барои мубориза бо таҳдидҳо аз самти Афғонистон фурӯхтааст”.

Дар пайи нашри хабари фурӯши паҳподҳои “Bayraktar TB2” ба Тоҷикиситон, намояндагони парлумони Қирғизистон бо нигаронӣ аз сарпарасти Вазорати хориҷаи ин кишвар Ҷонибек Кулубаев дар бораи ҳақиқати ин хабар пурсиданд. Кулубаев дар ҷавоб гуфт, “мо низ чунин хабарҳоро шунидем, вале то ҳанӯз маълумоти дақиқ надорем.”
Ҷаноби Кулубаев афзуд, ки Туркия дархости Қирғизситонро барои нафурӯхтани паҳподҳои “Bayraktar TB2” ба Тоҷикистонро рад кардаст.

Ҳамзамон бо рад кардани дархости Қирғизистон барои фурӯши паҳподҳо “Bayraktar TB2” ба Тоҷикиситон расонаҳои Туркия аз содир шудани ин паҳподҳо ба Тоҷикистон хабар медиҳанд.

Расонаи туркии “Beyaz Gazete” рӯзи 29-уми апрел соли 2022 менависад, ки “ҳавопаймои бесарнишини туркӣ “Bayraktar TB2″, ки муваффақияти кофии худро дар ҷаҳон собит кардааст ва корномаи хубе дар ҷангҳо нишон додаст, ниҳоятан ба Тоҷикистон содир шуд”, омадааст дар твиттери “Beyaz Gazete”.

Ҳамчунин “Dailysabah” гузориш медиҳад, ки ширкати “Байкар” бо се кишвари дигар қарордоди фурӯш бастааст ва шумораи харидорон ба 19 расидааст. Расонаҳои Туркия ҳадс мезананд, ки яке аз кишварҳои харидор Тоҷикистон аст.

Туркманистон ва Қирғистон ду кишвари Осиёи Марказӣ ҳастанд, ки пештар паҳподҳои “Bayraktar TB2”-ро харидорӣ карда буданд ва аз онҳо истифода мекунанд ва қарор аст Қазоқистон соли 2023 насли нави паҳподҳои туркиро дарёфт кунад. Агар содироти ин ҳавопаймоҳои бесарнишин ба Тоҷикистон тайид шавад, Тоҷикистон севумин кишвари минтақа хоҳад буд, ки дорои чунин парандаҳои ҷангӣ мебошад.

Як маҷмуаи паҳподҳои “Bayraktar TB2” дорои 6 паҳпод ва 2 маркази ҳидоятӣ ва як родор мебошад.

Арзиши ҳар паҳподи “Bayraktar TB2”- тибқи ҳисобҳо наздики 2 миллион доллар буда, истеҳсоли онҳо ба ширкати дифоии “Baykar”, ки ба хонаводаи Салчук Байрактар, домоди раисҷумҳури Туркия Раҷаб Тайиб Эрдуғон таъаллуқ дорад. Ва худи Байрактар мудири фанни ширкати “Байкар” мебошад.

Дар ҳамин ҳол корбарони шабакаҳои иҷтимоии тоҷик аз шунидани хабари фурӯши паҳподҳои “Bayraktar TB2” ба Тоҷикистон изҳори хурсандӣ намуда, аз он истиқбол карданд ва инро танҳо иқдоми дурусти режими Эмомалӣ Раҳмон дар 30 соли ҳукуматдорияш унвон кардаанд. Ҳамзамон баъзе аз корбарон мегӯянд, “сирри мард пинҳон” ва тарҷеҳ медиҳанд, чунин хабарҳо пинҳон бимонад.