Аз рӯзи 14-ум то 16-уми октябри соли ҷорӣ дар тамрингоҳи “Ҳарбмайдон”-и Тоҷикистон нишасти фаврии нерӯҳои зудамали Созмони Паймони Амнияти Дастаҷамъӣ (СПАД) баргузор шуд.
Тавре дафтари матбуоти СПАД хабар медиҳад, дар ин нишаст намояндагони вазоратҳои дифои кишварҳои Тоҷикистон, Қирғизистон, Қазоқистон, Русия ва як гурӯҳ аз афсарони Ситоди муштараки СПАД ширкат карданд.
Гуфта мешавад, ҳадаф аз ин ҳамоиши фаврӣ “таҳияи равишҳои ягона барои ташкили кори ҳайати оперативии мақомоти фармондеҳӣ ва назоратии Нерӯҳои зудамали дастаҷамъии Осиёи Марказӣ дар ҷараёни омодагӣ ба амалиёти ҷангӣ, такмили маҳорати нерӯҳо ва ҳамоҳангсозии фармондеҳӣ мебошад.”
Мавзуи нишасти мазкур “Асосҳои омодагӣ ва гузаронидани амалиёти ҷангӣ аз ҷониби Қувваҳои зудамали Дастаҷамъии Осиёи Марказӣ барои аз байн бурдани гурӯҳҳои мусаллаҳи ғайриқонунӣ, ки ба қаламрави яке аз кишвари узви СПАД ворид мешаванд”, будааст.
Ба иттилои манбаъ, қарор аст рӯзҳои 17-ум то 21-уми моҳи ҷорӣ машқҳои низомии муштараки нерӯҳои СПАД бо номи “Рубеж-2024” дар “Ҳарбмайдон”-и Тоҷикистон баргузор шавад.
Чандест дар нишастҳои нерӯҳои низомии СПАД ба бештар кардани тамринҳои низомӣ ва омодагии ҳолати ҷангӣ ишора мешавад. Ва инчунин таъкид мегардад, ки ба нерӯҳои зудамали ин созмон “таҳлили чолишҳо ва таҳдидҳо дар минтақаи Осиёи Марказӣ, тавсияҳои амалӣ дар бораи ташкил ва баргузории амалиёти ҷангӣ, омодасозии нерӯҳо барои ҷанги электронӣ, ошноӣ бо ҳавопаймоҳои бесарнишин ва муқовимат бо онҳо дар шароити ҷангӣ” ва ғайра омӯзиш дода мешавад.
Ба гуфтаи таҳлилгарон, пас аз омадани Толибон ба сари қудрат дар Афғонистон ва афзоиши гурӯҳҳои норозӣ аз ҳукуматҳои Осиёи Марказӣ раҳбарони ин кишварҳоро водор сохта, ки бо як пуштибони қавитаре гирди ҳам ҷамъ биёянд, то битавонанд умри ҳукуматдории худро дарозтар кунанд. Ва ҳар хаӣаре, ки бақои ҳукумати онҳоро таҳдид кунад, аз ин нерӯҳо истифода баранд, ҳамон гуна ки соли 2022 дар Қазоқистон бар зидди эътирозҳои мардумӣ истифода карданд.
