Ҷумҳурии исломии Эрон аз омодагии комили худ барои баргузории нишасти изтиротии вазирони корҳои хориҷии кишварҳои узви Созмони Ҳамкориҳои Исломӣ хабар дод.
Бино ба иттилои расонаҳо, Вазорати корҳои хориҷии Эрон бо ирсоли номае ба Дабири кулли Созмони Ҳамкориҳои Исломӣ аз омодагии кишвараш барои баргузории нишасти вазирони корҳои хориҷии узви ин созмон хабар додааст.
Эрон дар ин номаи худ гуфтааст, ки ин нишасти изтирории вазирони корҳои хориҷии кишварҳои исломӣ ба хотири баррасии вазъият дар Фаластин ва ҳамлаҳои густурдаи Исроил ба Ғазза даъват карда мешаванд.
Вазири ҷанги Исроил рӯзи гузашта эълон карда буд, ки Ғазза дар муҳосираи комил қарор дорад ва интиқоли барқ, газ, оби нӯшиданӣ, хӯрокиҳо ва ҳамагуна кумакҳои дигар барои мардуми ин минтақа қатъ карда шудааст.
Вазорати корҳои хориҷии Эрон ба хотири баргузории ин нишасти изтирорӣ ройзаниҳои худро бо хеле аз кишварҳои исломӣ оғоз кардааст. Вазорати корҳои хориҷии Тоҷикистон низ хабар дода, ки мулоқоти вазири ин ниҳод Сироҷиддин Муҳриддин бо муовини вазири корҳои хориҷии Ҷумҳурии исломии Эрон Меҳди Сафарӣ доир гардид.
Дабири кулли Созмони Милали Муттаҳид ва раҳбари сиёсати хориҷии Иттиҳоди Аврупо аз ин иқдомаи Исроил интиқод карда, гуфта буданд, ки қатъ кардани интиқоли барқу газ, иби нӯшиданӣ, хӯрокиҳо ва дигар кумакҳои аввалия ба мардуми осоишта бахше аз ҷиноятҳои ҷангӣ дониста мешаванд.
Гуфта мешавад, субҳи 7-уми октябри соли 2023 нерӯҳои ҲАМОС дар Фаластин эълон кард, ки ҳамлаҳои худ алайҳи Исроилро зери унвони “Тӯфони Ақсо” дар ҳимоят аз масҷиди Ақсо оғоз кардааст. Ин ҳамлаҳоро ба хотири ҷиноятҳои қатлу куштори фаластиниён дар кӯчаву хиёбонҳо ва ишғоли хонаҳо ва тахриби манзилҳои зисти онҳо дар шаҳраку рустоҳо эълон карда буд.
Бо гузашти 5 рӯз аз оғози ҷанг дар Фаластин лаҳза ба лаҳза теъдоди қурбониён афзоиш меёбад. То ин муддат расонаҳо аз кушта шудани беш аз 1000 фаластинӣ аз аҳолии Ғазза, ки бештарашонро занону кӯдакон ташкил медиҳанд ва инчунин беш аз 1200 исроилӣ хабар додаанд.
Мақомоти Исроил дар як вақт ҳам бо баҳонаи ҳамла ба маконҳои нерӯҳои Ҳамос ва Ҷиҳоди исломӣ мардуми Ғаззаро, ки 16 сол инҷониб дар муҳосираи комил қарор доранд, мавриди бомбаборони шадид қарор медиҳанд ва аз сӯи дигар, бо нерӯҳои Ҳизбуллоҳи Лубон даргир шудаанд. Инчунин ба иттилои расонаҳо, дар дигар шаҳрҳои Фаластин, аз ҷумла дар Қудс нерӯҳои исроилӣ тайи ин панҷ рӯз назид ба 20 нафарро ба қатл расонида ва даҳҳо каси дигарро маҷруҳ кардаанд.
