Эътилофи нерӯҳои мухолифи тоҷик дар хориҷ аз кишвар – Паймони миллии Тоҷикистон бо навиштани номае ба Шоҳигарии Ҳолланд аз ӯ хостааст, ки алайҳи Эмомалӣ Раҳмон ба унвони як диктатор таҳрим ҷорӣ кунад.
ПМТ дар номааш ба Подшоҳи кишвари Ҳолланд Виллем Александр навишта, ки “Эмомалӣ Раҳмон, ки бо саркӯбҳои бераҳмона алайҳи рақибони сиёсӣ ва ҷомеаи шаҳрвандӣ, аз ҷумла алайҳи ҲНИТ дар соли 2015, мардуми Бадахшон дар соли 2022 ва 6 хабарнигор дар соли 2022 маъруф аст, тамоми озодиҳои шаҳрвандонро шадидан маҳдуд кардааст”.
Эътилофи мухолифин ҳамчунин гуфтааст, ки кишварҳои аврупоӣ, аз ҷумла Ҳолланд, хатари диктатураи Лукашенко дар Беларусро дарк карда, ӯро таҳрим карданд, аммо на танҳо диктатори Тоҷикистонро таҳрим накардаанд, балки аз ӯ истиқбол доранд.
“Бояд ёдовар шуд, ки хатари Раҳмон барои ҷомеаи мутамаддини ҷаҳон аз хатари Лукашенко камтар нест”, омадааст дар номаи ПМТ ба Шоҳи Ҳолланд.
Шакли комили номаи ПМТ ба Подшоҳи Ҳолланд Виллем Александр:
Умедворам, ки Шумо сиҳату саломат ҳастед.
Тибқи иттилои ба мо расида, раисҷумҳур ва диктатори Тоҷикистон Эмомалӣ Раҳмон аз 21.03.2023 то 29.03.2023 ба Аврупо, аз ҷумла Ҳолланд ва ИМА сафар карда, дар Ню-Йорк бо Шумо дидор хоҳад кард.
Эмомалӣ Раҳмон, тӯлонитарин диктатор дар Иттиҳоди Шӯравии собиқ, ки аз соли 1992 бо истифода аз зӯр ва тағйири Қонуни асосӣ дар қудрат аст, яке аз шарикони муҳими Путин ба ҳисоб меравад ва бинобар ин, пас аз ҳамлаи Русия ба Украина Путин аввалин сафари худро ба хориҷа ба Точикистон анҷом дод.
Эмомалӣ Раҳмон, ки бо саркӯбҳои бераҳмона алайҳи рақибони сиёсӣ ва ҷомеаи шаҳрвандӣ, аз ҷумла соли 2015 алайҳи ҲНИТ, соли 2022 алайҳи мардуми Бадахшон ва 6 хабарнигор машҳур шуда, тамоми озодиҳои шаҳрвандонро дар кишвар шадидан маҳдуд кардааст.
Кишварҳои аврупоӣ, аз ҷумла Ҳолланд, хатари диктатураи Лукашенко дар Беларусро дарк карда, бар зидди ӯ таҳримҳо ҷорӣ кардаанд, аммо диктатори Тоҷикистонро на танҳо таҳрим накарданд, балки аз ӯ истиқбол кардаанд. Бояд ёдовар шуд, ки хатари Раҳмон барои ҷомеаи мутамаддини ҷаҳон аз хатари Лукашенко камтар нест.
Дар ҳоле, ки дастони Раҳмон ва хонаводааш ҳоло хуни шаҳидони Бадахшон олуда аст, Раҳмон аз Олмон ва дигар кишварҳои ғарбӣ боздид мекунад. Аз Шумо хоҳиш мекунем, ки аз ин диктатори шарику ҳампаймони Путин талаб карда шавад, ки Абдуллоҳи Шамсиддинро, ки чанде пеш аз Олмон ба Тоҷикистон ихроҷ шуда буд, фавран озод карда, ба назди хонаводааш дар Аврупо баргардонад.
Мо инчунин аз Шумо ва кишварҳои озод даъват менамоем, ки минбаъд низ дар қонунигардонии режимҳои худкома саҳм нагузоред, ба онҳо дар таъқиби дигарандешони кишварҳояшон кумак накунед ва ба ин васила ба онҳо барои содир кардани ҷиноят алайҳи башарият ва поймол кардани ҳуқуқу озодиҳои шаҳрвандон иҷозат надиҳед.
Бо эҳтиром, Муҳиддин Кабирӣ Раиси Паймони миллии Тоҷикистон 20.03.2023
