Вазири маориф ва илми Тоҷикистон имрӯз, 26-уми июл зимни нишасти матбуотии ниҳодаш аз мушкили норасоии омӯзгорон дар мактабҳои миёна шикоят кард.
Раҳим Саидзода, вазири маориф ва илми кишвар мегӯяд, ки дар соҳаи маориф мушкилот зиёд аст ва ҳамаро дар як замони кӯтоҳ бартараф карда намешавад. Вазир гуфт, ки мушкилии асосии ин соҳа норасоии омӯзгорон аст, ки ба гуфтаи ӯ, имсол дар мактабҳои миёнаи умумӣ 2670 омӯзгор намерасад.
Вазорати маориф ва илми Тоҷикистон ҳамасола дар нишастҳои матбуотияш аз норасоии омӯзгорон дар муассисаҳои таҳсилоти миёнаи умумӣ шикоят мекунад. Аз ҷумла, соли 2022 гуфта мешуд, ки 3406 омӯзгор дар муассисаҳои таълимии кишвар намерасад, дар ҳоле, ки худи ҳамон сол тибқи оморҳои расмӣ 7153 кас бо тахассуси омӯзгор донишгоҳу донишкадаҳои кишварро хатм карда буд.
Ҳамчунин дар нишасти имрӯза аз вазири маориф сабаби баъзе бетартибиҳо дар байни донишомӯзони мактабҳои миёна пурсида шуд, ки ӯ ин мушкилиро ба шумори зиёди онҳо рабт дода гуфт: “Шумораи хонандагони муассисаҳои таҳсилоти миёнаи умумӣ ҳозир 2 миллону 287 ҳазор аст. Мехоҳӣ намехоҳӣ дар байни ин миқдор донишомӯз як ҳодиса вайрон мешавад.”
Вазир ҳамчунин илова кард, ки омори ҷинояткорӣ ва бетартибӣ дар байни донишомӯзони мактабҳои миёна дар қиёс ба шумораи умумии хонандагон “як фоизро ҳам ташкил намедиҳад.”
Ба гуфтаи бархе коршиносони соҳа, вазири маориф ба ҷои кам нишон додани бетартибиҳо ва худсафедкунӣ беҳтар мебуд, ки ба ҷой доштани чунин мушкилӣ иқрор мешуд ва роҳи ҳал меҷуст, на ин ки мушкилиро нодида бигирад.
