Ширкати ҳавопаймоии русӣ “Уральские авиалинии” дар торнамои худ ба мусофирон пешниҳод мекунад, ки ба хатсайрҳои мустақим аз Маскав ба шаҳрҳои Душанбе ва Хуҷанд шурӯъ аз 13 июл метавонанд чипта харанд.
Нархи чиптаи хатсайри Маскав — Хуҷанд аз 10 ҳазору 844 рубл (тақрибан 1609 сомонӣ) ва хатсайри Маскав — Душанбе аз 15 ҳазору 136 руб (тақрибан 2246 сомонӣ) оғоз мегардад. Дар ҷадвали хатсайрҳо зикр шудааст, ки ширкат дар як рӯз 4 хатсайри мустақими нуқтаи таъин-бозгаштро анҷом медиҳад: 2 парвоз ба Хуҷанд ва 2 парвоз ба Душанбе.
Ширкати ҳавопаймоии “ЮтЭйр” бошад дар сомонаи расмии худ дар бахши “Ҷадвали хатсайрҳо” харидории билетҳоро ба хатсайрҳои мустақим ба Душанбе шурӯъ аз 30 июн пешниҳод мекунад. Арзиши билетҳо аз 13 ҳазору 600 рубл (тақрибан 2018 сомонӣ) ба хатсайри Маскав — Душанбе оғоз мегардад. Ба хатсайри Душанбе — Маскав билетҳо каме гаронтар буда, нархи пасттаринаш 15 ҳазору 840 рубл (тақрибан 2350 сомонӣ) зикр шудааст. Ба самти Хуҷанд — Маскав дар як ҳафта бо се хатсайр парвозҳо анҷом дода мешаванд.
Барои дарёфти маълумоти бештар дар бораи барқраор шудани алоқаи ҳавоӣ байни кишварҳо аз 1 июл “Азия-Плюс” ба Агентии авиатсияи граждании Тоҷикистон муроҷиат кард. Дар он ҷо аз шарҳи масъала худдорӣ намуда, тавсия доданд, ки бо ин масъала ба онҳо хаттӣ муроҷиат кунанд. Дар ҳамин ҳол, сарҳадҳо байни давлатҳо баста боқӣ мемонанд. Бо мақсади пешгирии паҳншавии коронавирус аз 20 март ҳамаи фурудгоҳҳои Тоҷикистон барои қабулу парвоз баста шуданд. Лекин баъдтар барои аз хориҷи кишвар ба ватан баргардонидани тоҷикистониён хатсайрҳои чартерӣ роҳандозӣ шуданд.
Қаблан намояндагии дипломатии Тоҷикистон дар Маскав аз ҳамватанон даъват кард, ки ба маълумоти шубҳанок ва носанҷида бовар накарда, аз сафар ба самти Тоҷикистон тавассути нақлиёти заминӣ, аз ҷумла автобусу таксӣ ва ҳар гуна мошинҳои дигар худдорӣ намоянд.“Дар сурати ташкил шудани рейсҳои чартерии ҳавопаймоҳо ва ё барқарор шудани хатсайрҳои мунтазам, инчунин кушодашавии сарҳадҳо, шумо тавассути сомона ва дигар зарфиятҳои интернетии расмии сафорат Россия хабардор карда мешавед”, — гуфта мешавад дар хабар.
Аммо мақомоти Тоҷикистон хабарҳоро дар бораи оғози парвозҳои байнулмилалӣ аз ҷумла, ба самти Русия, рад карданд. Парвози ҳавопаймоҳо аз Тоҷикистон ба хориҷ ва баръакс аз нимаи дувуми моҳи март қатъ шудааст.
Масъулони Оҷонси авиатсияи шаҳрвандии Тоҷикистон гуфтаанд, ҳанӯз ба ҳавопаймоҳои ягон ширкат иҷозаи парвоз надоданд ва рафтуои ҳавоӣ танҳо баъди ба эътидол омадани вазъи вобаста ба коронавируси нав имконпазир хоҳад шуд. Оҷонси авиатсияи шаҳрвандӣ рӯзи 4-уми июн бо нашри баёнияе гуфтааст, парвозҳои маъмулии ҳавопаймоҳо ба Русия ва кишварҳои дигар «танҳо пас аз муътадил шудани вазъияти вобаста ба CОVID-19 ва эълони расмии мақомоти давлатӣ амалӣ карда мешавад».
