Мақомоти Тоҷикистону Қирғизистон пас аз 10 соати даргириҳои мусаллаҳона дар нуқтаҳои марзӣ, барои ҳалли низоъ музокиротро оғоз карданд.
Имрӯз, сарони Кумитаҳои давлатии амнияти миллии Тоҷикистону Қирғизистон дар гузаргоҳи гумрукии “Равод”-и Ӯзбекистон музокироти худро оғоз карданд.
Дар ин музокирот бар иловаи Саймумин Ятимов, раиси КДАМ ҶТ ва Қамчибек Тошиев, раиси КДАМ ҶҚ, инчунин раисони вилоятҳои Суғд ва Боткен ва дигар мақомоти расмӣ аз ҷониби ҳар ду кишвар ҳузур доранд.
Пеш аз ин Кумитаи давлатии амнияти миллии Тоҷикистон таъкид карда буд, ки бо вуҷуд чанд соат гузаштан аз оғози низоъҳои мусаллаҳона дар марзҳои муштарак ҳамоно ҷониби Қирғизистон аз нишастан сари мизи музокирот сарпечӣ мекунад.
Гуфта мешавад, ҷонибҳо ба мувофиқа расиданд, ки оташбас эълон карда шавад. Ва бар асоси тавофуқҳои ҳосилшуда ҳар ду ҷониб вазифадор шуданд, ки нерӯҳои худро ба ҷойҳое, ки пеш аз оғози низоъҳои мусаллаҳона ҳузур доштанд, бар мегардонанд, тавофуқе, ки сокинони маҳаллиро нигарон кардааст.
