Нимаи дуюми имрӯз мақомот мурофиаи додгоҳии журналист Абдуллоҳи Ғурбатиро пушти дарҳои баста дар СИЗО аз нав оғоз карданд.
Бино ба иттилои хабаргузории “Азия Плюс” имрӯз “дар боздоштгоҳи муваққатии шаҳри Душанбе (СИЗО) мурофиаи навбатии додгоҳии журналисти тоҷик Абдуллоҳ Ғурбатӣ оғоз шуд.”
Ба қавли манбаъ, ин бор низ муҳокимаи додгоҳии журналист ва блогери тоҷик Абдуллоҳи Ғурбатӣ пушти дарҳои баста ва бидуни ҳузури наздикону пайвандон ва намояндаҳои ВАО анҷом ёфт. Вале ин бор ҳам Додгоҳ эълони ҳукми ниҳоиро ба рӯзи дигар гузоштааст.
“Зикр карда мешавад, ки дар ин мурофиа вакили дифоъ аз суд хоҳиш намудааст, ки нисбати зерҳимояаш Абдуллоҳ Ғурбатӣ ҳукми сафедкунанда қабул кунад ва ӯро аз толори суд озод намояд.”, омадааст дар хабар.
Пеш аз ин дар ҷаласаи додгоҳии қаблии ин журналисти ҷавон ва шинохтаи кишварамон айбдоркунандаи давлатӣ аз додрас хоста буд, ки Абдуллоҳи Ғурбатиро ба 8 соли зиндони низомаш пурзӯр маҳкум кунад ва додрас ҳам ба хотири баррасии парванда ба хонаи машварат рафт ва қарор буд имрӯз ҳукмашро эълон кунад, аммо боз ба таъхир гузошта шуд.
Гуфта мешавад, мақомоти Тоҷикистон се моҳ пеш бо роҳандозии як иқдом алайҳи бархе фаъолони шабакаҳои иҷтимоӣ дар зарфи камтар аз як ҳафта журналист Абдуллоҳи Ғурбатиро ҳамроҳ бо Далери Имомалӣ, Завқибек Саидаминӣ ва Абдусаттор Пирмуҳаммадзода боздошт ва пушти миллаҳои зиндон фиристода буданд.
Ҳамсари Абдуллоҳи Ғурбатӣ ҳам чанд рӯз пеш бо ирсоли ду номае аз Эмомалӣ Раҳмон хоста буд, ки ба қазияи шавҳараш, ки бегуноҳ ва бо туҳмат дар боздоштгоҳи муваққатии шаҳри Душанбе қарор дорад, дахолат кунад ва ҳақро ба ҳақдор бирасонад.
