Игор Лякин-Фролов сафири Русия дар Тоҷикистон зимни нишасти хабариаш дар Душанбе оиди гуфтушунидҳои Тоҷикистону Русия барои харидани ваксинаи зидди коронавирус бо номи «Спутник V” хабар додааст.
РИА Новости аз қавли Лякин-Фролов менависад, ки “Масъалаи таъмини ваксинаи зидди коронавируси нав дар сатҳи вазоратҳои тандурустии ду кишвар баррасӣ мешавад. Ҳоло гуфтушунидҳо идома доранд.”
Вале то ҳол аз ҷониби мақомоти Тоҷикистон дар мавриди харидории ваксинаи зидди коронавирус ба таври расмӣ эълон нагардидааст.
Чанде пеш расонаҳо аз қавли Вазорати тандурустӣ ва ҳифзи иҷтимоии аҳолии Ҷумҳури Тоҷикистон навишта буданд, ки ваксинаи коронавируси истеҳсоли Русия ҳамаи марҳилаҳоро гузарад, Созмони ҷаҳонии беҳдошт дар мавриди таъсири он иҷозатнома диҳад, баъд Тоҷикистон онро харидорӣ мекунад.
Русия бо сохти воксинаи “Спутник V” мӯътақид аст, ки ин ваксинаи сохтааш бар зидди коронавирус фаъол мебошад ва агарчи аз ҳамаи озмоишҳо гузашта бошад ҳам, вале то ба имрӯз аз ҷониби Созмони ҷаҳонии беҳдошт мавриди таъйид қарор нагирифтааст.
Ҷониби Русия ваксинаро ҳамчун “василаи бехатару муассир ва дар дарозмуддат бидуни паёмадҳои манфӣ” тавсиф карда, таъкид мекунад, ки ин ваксина “нахустин ваксинаи дар ҷаҳон сабтиномшуда барои пешгирӣ аз COVID-19 мебошад”.
Аммо кишварҳои Ғарбӣ ва Амрико ба ваксинаи истеҳсолгардида аз ҷониби ширкати дорусозии амрикоии “Pfizer” ва озмоишгоҳи олмонии “BioNTech”, бартарӣ медиҳанд.
