Вазорати корҳои хориҷии Тоҷикистон мегӯяд, ки дар натиҷаи муноқишаҳои мусаллаҳонаи ахири марзӣ беш аз 250 нафар тоҷикистонӣ кушта ва захмӣ шудааст.
13-уми октябри соли 2022 Вазорати корҳои хориҷии Тоҷикистон иттилоъ дод, ки Сироҷиддин Муҳриддин дар нишасти Шӯрои вазирони хориҷии кишварҳои узви Иттиҳоди Давлатҳои Мустақил иттиҳомоти ҷониби Қирғизистонро рад кардааст.
Раҳбари дастгоҳи диплумосии Тоҷикистон ҷониби Қирғизистонро ба “таҷовузи низомии қаблан тарҳрезишуда” алайҳи Тоҷикистон муттаҳам карда, ба ҳамтоёнаш аз кишварҳои узви ИДМ гуфтааст, ки “дар натиҷаи он беш аз панҷоҳ нафар кушта шуда, тақрибан дусад нафар мардуми осоишта ярадор шуданд.”
Бо вуҷуди он ки то ҳол мақомоти Тоҷикистон ва Қирғизистон омори дақиқеро дар бораи талафоти ҷонӣ ва молӣ ва аз ҳар ду ҷониб ба мардум ироа накардаанд, вале пеш аз ин бархе расонаҳо, аз ҷумла Azda tv ва Радиои Озодӣ феҳристҳоеро дар бораи афроди кушташуда тартиб дода буданд, ки ахиран сомонаи Радиои Озодӣ низ номи 80 нафарро зикр карда буд.
Гуфта мешавад, бо гузашти наздик ба як моҳ аз муноқишаҳои хунини манотиқи наздисарҳадии Тоҷикистон ва Қирғизистон ҳамоно ҳеч яке аз тарафҳо эътироф накардааст, ки барои оғози ин ҳамлаҳо ва шиддат бахшидан ба низоъҳои мусаллаҳона аз пеш нақша кашида, омодагӣ дидааст, балки ҳамеша ҳар ду ҷониб аз минбарҳои мухталиф якдигарро бо оғози ҷанг муттаҳам мекунанд.
