Шоми рӯзи 26-уми ноябр бо миёнҷигарии Амрико миёни Исроил ва “Ҳизбуллоҳ”-и Лубнон оташбас ҷорӣ шуд.
Бинёмин Натанёҳу, нахуствазири Исроил пас аз ҷаласаи кобинаи кишвараш дар мавриди оташбас бо Лубнонро эълон кард. Ҳамчунин субҳи рӯзи чоршанбе Ҷо Байден, раисҷумҳури Амрико низ аз ҷорӣ шудани ин оташбас хабар дод.
Гуфта мешавад, Телавив ва Бейрут бар сари барқарори оташбас барои поён додани ҷанг ба тавофуқ расиданд. Байден эълом кард, ки нерӯҳои низомӣ ва амниятии Лубнон тайи 60 рӯзи оянда дар ҷануби Лубнон ҷобаҷо шуда, контроли ин минтақаро ба даст хоҳанд гирифт. Ва Исроил низ ба тадриҷ нерӯҳои боқимондаи худро то ин муддат берун хоҳад кард.
Раисҷумҳури Амрико таъкид кард, ки дар рӯзҳои оянда ҳамроҳи Туркия, Миср ва Қатар масъалаи оташбас миёни гурӯҳи ҲАМОС ва Исроилро низ оғоз мекунад.
Шоми дирӯз пас аз ҷаласаи кобинаи Исроил расонаҳои ин кишвар мувофиқати оташбас дар Лубнонро таъйид када буданд, вале баъд аз эълони оташбас ҳамлаҳои Исроил ба Бейрут идома кард. Исроил ин ҳамлаи худро дуруст шуморида мегӯяд, оташбас аз 27-ум соати 10-и субҳ ба вақти маҳаллӣ ба иҷро даромадааст.
Хабаргузории “Ройтерз” аз қавли як манбаи огоҳи лубнонӣ навишта, ки яке аз бандҳои асосии ин оташ таваққуфи комили ҳамлаҳои ҳавоӣ ва заминии Исроил ба хонаҳо ва пойгоҳии низомии “Ҳизбуллоҳ” аст. Ва иничунин гурӯҳи “Ҳизбуллоҳ” ва ҳампаймононаш низ вазифадор ҳастанд аз ҳамагуна зарбаҳо ба сӯи Исроил худдорӣ кунанд.
Аз бандҳои муҳими созишномаи оташбас ин аст, ки Исроил дар давоми 60 рӯз бояд тамоми нерӯҳояшро аз хоки Лубнон берун барорад, мардуми осоиштаи муҳоҷири Лубнон ба хонаҳояшон баргарданд, нерӯҳои “Ҳизбуллоҳ” бояд то дарёи Литонӣ, ки 30 километр аз марзи Исроил дур аст, пас раванд, артиши Лубнон бояд дар ҷануби дарёи Литонӣ ҷойгир шавад ва марзро нерӯҳои Посдорони сулҳи СММ, артиши Лубнон ва артиши Исроил назорат хоҳанд кард.
Ёдовар мешавем, ки пас аз ҳамлаи ҲАМОС ба заминҳои ишғолшудаи Фаластин аз 7-уми октябри соли 2023 Исроил ҳамлаи густардаи худро болои мардуми осоиштаи Ғазза шуруъ кард, ки то кунун идома дорад ва беш аз 45 ҳазор кас кушта шудааст. Дар пайи ин ҳамлаҳо “Ҳизбуллоҳ”-и Лубнон низ ба харобкориҳои Исроил посух дод. Дар натиҷа Исроил бо Лубнон низ вориди ҷанг шуда, раҳбари ин гурӯҳ Ҳасан Насруллоҳ ва баъдан чандин раҳбарони ин гурӯҳро гушт, ки ин боиси шиддат гирифтани даргирӣ миёни Исроил ва “Ҳизбуллоҳ” гашт.
