Мақомоти Озарбойҷон аз омодагии худ барои пешниҳоди даъво алайҳи Русия ба Додгоҳи байналмилалӣ ҷиноӣ хабар дод.
Гуфта мешавад, ин тасмими Озарбойҷон дар пайи суқути ҳавопаймои мусофирбарии ширкати AZAL Embraer 190, ки дар наздикии шаҳри Актауи Қазоқистон суқут кард, гирифта шудааст.
Боку ба ҷамъоварии далелҳо шуруъ кардааст ва Маскавро барои ба дӯш нагирифтани мсъулият муттаҳам мекунад. Вазоратҳои нақлиёти Қазоқистон ва ширкати ҳавопаймоии Озарбойҷон тасдиқ намуданд, ки Русия дар суқути ҳавопаймо даст дошт. Озарбойҷон талаб мекунад, ки Русия гуноҳро эътироф кунад ва агар эътироф накунад, роҳҳои қонунии дигарро пеш хоҳад гирифт.
Расонаҳои озарбойҷонӣ менависанд, ки Владимир Путин, раисиҷумҳури Русия дар як суҳбат бо Илҳом Алиев, раисҷумҳури Озарбойҷон изҳори таслият намуда, иқрор карда буд, ки дар замони ҳодиса нерӯҳои дифои ҳавоии Русия ҳамлаҳои ҳавопаймоҳои бесарнишини Украинаро дар фазои Грозний, Моздок ва Владикавказ мавриди ҳадаф қарор медоданд, ки тасодуфан ба ҳавопаймои мусофирбарӣ бархӯрдааст. Боку ин иқрори Путинро ҳамчун далел барои баррасии парвандаҳои байналмилалӣ кофӣ медонад.
Ёдовар мешавем, ки ҳавопаймои мусофирбари ширкати AZAL Embraer 190 25-уми декабри соли 2024 аз Боку ба Грозний парвоз дошт. Ин ҳавопаймо, ки 67 мусофир дошт, дар ҳудуди Қазоқистон суқут кард. Бар асари суқуқти он 38 нафар кушта шуда, 29 нафар зинда монданд.
