Парлумони Аврупо рӯзи чаҳоршанбе, 23-уми ноябри соли ҷорӣ қатъномаеро дар бораи эътироф кардани Русия ба унвони кишвари ҳомии терроризм қабул кард.
Тавре маркази матбуоти парлумои Иттиҳоди Аврупо хабар медиҳад, дар қабули қатънома 494 вакил пуштибонӣ карданд, 58 вакил мухолиф раъйи доданд ва 44 нафари дигар бетараф монданд.
Дар ин қатънома порлумони Аврупо Русияро ба далели “ҳамлаҳои гусатрда ба манотиқи аҳолинишин ва нобуд сохтани зерсохторҳои муҳими энержии Украина”, ки дар натиҷа ҳазорон нафар кушта шудаанд, ҳомии терроризм хондааст.
Дар қатъномаи Иттиҳоди Аврупо оварда шуда, ки Русия ба хотири даст задан ба кушторҳои одамони бегуноҳ, шиканҷа, одамрабоӣ ва таҷовуз ба номуси занон дар манотиқи ишғол кардааш, таҷовузгар аст. Ба хусус аз куштори оммавӣ дар Буча, Ирпен, Изюм ва Лиман, инчунин ҳамлаҳо ба театри Мариупол ва истгоҳи роҳи оҳани Краматорск низ ёдовар шудааст.
Дар қатънома ҳамчунин қайд гардида, ки Русия принсипҳои Оинномаи СММ-ро нақз карда, дар Мариупол буҳрони башардӯстона ба вуҷуд оварда, 95%-и шаҳрро тахриб кардааст, дастрасии шаҳрвнадонро ба обу газ, барқ, интернет, инчунин дастрасӣ ба хидматрасониҳоро барои мардум ба куллӣ масдуд кардааст.
Бо ин далоил парлумони Иттиҳоди Аврупо Русияро кишвари сарпараси терроризм унвон карда, аз давлатҳои узви он хоста, ки дар баробари “ҳамлаҳои Русия ба Украина” мавқеъҳои ҷиддитаре бигиранд.
