Парвозҳои мустақим дар масири Теҳрон-Душанбе-Теҳрон пас аз танаффуси дусола, ки бар асари пандемияи коронавирус қатъ шуда буд, аз рӯзи 13-уми июн дубора барқарор мешаванд.
Хабаргузории “IRNA” дар истинод ба вазири роҳу шаҳрсозии Ҷумҳурии исломии Эрон Рустам Қосимӣ хабар дод, ки рӯзи парвози нахустин дар ин масир дар ҷараёни сафари расмии раисҷумҳури Тоҷикистон Эмомалӣ Раҳмон ба Эрон ба мувофиқа расида, ҳафтае ду парвоз анҷом мешавад.
Рустам Қосимӣ гуфтааст, ки мувофиқи тавофуқ теъдоди парвозҳо оҳиста-оҳиста то чаҳор парвоз дар як ҳафта расонда мешавад.
Пештар дар бораи азсаргирии парвозҳо бо Эрон, Азия-Плюс дар истинод ба Агентии авиатсияи граждании Тоҷикистон хабар дода буд. Дар хабар гуфта мешуд, ки парвозҳои мустақим дар масири Душанбе-Теҳрон тавассути ҳавопаймоҳои “Iran Air” анҷом дода мешавад ва дар сурати имкониат ширкати “Сомон Эйр” ҳам дар ин масир парвозҳо анҷом хоҳад дод.
